Флот белсенділері сейсенбі күні «X» әлеуметтік желісінде жариялаған мәлімдемеде өздерін «әлемдегі адамгершілігі жоғары армия» деп сипаттайтын Израиль әскері үш апта ішінде екінші рет олардың достарын халықаралық су айдынынан күштеп алып кеткенін хабарлады.
Мәлімдемеде заңсыз ұстап әкетуге наразылық білдіру және Израиль түрмелерінде отырған 9 500-ден астам палестиналық тұтқынды қолдау үшін кемінде 87 белсендінің бостандыққа шыққанға дейін аштық жариялайтыны айтылды.
«Жаһандық Сумуд» флоты Израиль билігінен ұсталған барлық белсендіні босатуды талап етіп, елдерді бұл теңіз қарақшылығын айыптауға шақырды. Сонымен қатар 2007 жылдан бергі Газа секторындағы қоршауды тоқтатуды, флот мүшелері мен барлық палестиналық тұтқынды босатуды талап етті.
Флот көмек керуеніндегі 50 кеменің барлығы Израиль тарапынан басып алынғанын мәлімдеді. Кемелерде 44 елден 428 адам, оның ішінде 78 Түркия азаматы болған.
Израиль Сыртқы істер министрлігі «X» желісінде барлық белсендінің Израиль кемелеріне ауыстырылып, Израильге жеткізіліп жатқанын және елге жеткеннен кейін консулдық өкілдермен кездесе алатынын мәлімдеді.
Флот өткен бейсенбі күні Мармарис қаласынан Газаға жолға шыққан болатын.
Сәуір айының соңында Израиль күштері Крит аралы маңындағы халықаралық су айдынында тағы бір флотқа шабуыл жасаған болатын. Ол кезде керуенде 39 елден 345 адам болған.
