Түркия Сыртқы істер министрі Хакан Фидан мен Иран Сыртқы істер министрі Аббас Аракчи телефон арқылы сөйлесіп, АҚШ-пен жүргізіліп жатқан келіссөздер барысындағы соңғы жағдайды талқылады.
Иран бұқаралық ақпарат құралдарының хабарлауынша, АҚШ Тегеранның ұсынысына берген жауабында нақты ешқандай жеңілдік қарастырмаған.
«Fars» агенттігінің мәліметіне сәйкес, Вашингтон Иранға тек бір ғана ядролық нысанды пайдалануды жалғастыруға рұқсат беріп, жоғары деңгейде байытылған уран қорын АҚШ-қа тапсыруды талап ететін бес тармақтан тұратын тізім ұсынған.
Сондай-ақ АҚШ-тың Иранның бұғатталған активтерінің тіпті 25 пайызын босатудан немесе соғыс салдарынан келген шығын үшін өтемақы төлеуден бас тартқаны хабарланды.
АҚШ келіссөздердің басталуын барлық майдандардағы қақтығыстардың тоқтатылуымен байланыстырды.
Ирандық ақпарат құралдары АҚШ-тың қақтығыстар кезінде қол жеткізе алмаған талаптарын келіссөздер арқылы орындатуға тырысып отырғанын және бұл жағдайдың тығырыққа тірелуіне себеп болғанын жеткізді.
Өз ұсынысында Иран Ливанмен қатар барлық бағыттағы соғыстың тоқтатылуын және АҚШ-тың теңіз қоршауын доғаруын талап етті.
Сондай-ақ Тегеран стратегиялық маңызы зор Ормуз бұғазын басқарып отырғанын мәлімдеді.
АҚШ пен Израильдің 2026 жылдың ақпанында Иранға жасаған шабуылдарынан бері өңірдегі шиеленіс күшейе түсті.
2026 жылдың 8 сәуірінен бері атысты тоқтату режимі күшінде болғанына қарамастан, Иран Қарулы күштерінің ресми өкілі Әбулфазл Шикарчи жексенбі күні Дональд Трампқа ескерту жасады. Шикарчи: «АҚШ-тың шарасыз президенті қоқан-лоққылары жүзеге асқан жағдайда, елінің ресурстары мен армиясының бұрын-соңды болмаған агрессивті, күтпеген сценарийлерге тап болатынын білуі тиіс», – деді.
