АҚШ президенті Дональд Трамп Бейжіңде Қытай Халық Республикасының Төрағасы Си Цзиньпинмен өткен кездесуде АҚШ пен Қытай арасындағы қатынастардың болашағына қатысты оң көзқарас білдіріп, екіжақты байланыстардың бұрын-соңды болмаған деңгейде жақсаратынын айтты.
Трамп Қытай басшысымен жеке қарым-қатынасының жақындығын атап өтіп, Халық сарайында өткен салтанатты рәсімде Си Цзиньпинге жоғары баға берді.
Ол: «Қытайды және атқарып отырған қызметіңізді құрметтеймін. Сіз – тамаша көшбасшысыз. Сіздің досыңыз болу ̶ мен үшін мәртебе», – деді.
Ал Си Цзиньпин Дональд Трамппен маңызды мәселелерді талқылап, Қытай мен АҚШ арасындағы қатынастарды дұрыс арнаға бағыттау арқылы болашақ үшін жаңа қадам басуды қалайтындарын айтты.
Екі көшбасшының кездесуі сауда және іскерлік байланыстарды кеңейту мәселесіне арналды. Өңірлік қауіпсіздік мәселелері де күн тәртібінде болды. Сондай-ақ АҚШ пен Израильдің 28 ақпанда басталған Иранға қарсы шабуылдарынан кейін Таяу Шығыстағы шиеленіс талқыланды.
Атысты тоқтату режиміне қарамастан Қытай тараптарды диалог жүргізуге шақырды. Ал Вашингтон Бейжіңді Иранның әскери және экономикалық инфрақұрылымын қолдады деп айыптаған болатын.
Дональд Трамп делегациясының құрамында АҚШ мемлекеттік хатшысы Марко Рубио, Пентагон басшысы Пит Хегсет, сондай-ақ «Tesla», «NVIDIA» және «Apple» секілді ірі америкалық компаниялардың бас директорлары бар.
Дональд Трамп 2017 жылы Қытайға ресми сапармен барған болатын.
