Мәскеу шетел азаматтары мен дипломаттарды Киевтен кетуге шақырды.
Ресей Сыртқы істер министрлігі Киевтегі шешім қабылдау орталықтары мен басқару бекеттері нысанаға алынатынын хабарлады.
Министрлік дипломатиялық қызметкерлерді, халықаралық ұйымдардың өкілдерін және өзге де шетел азаматтарын Киевтен мүмкіндігінше қысқа уақыт ішінде кетуге шақырды.
Бұл ескерту Ресей билігі Украина өңірлеріне жасалған түнгі шабуыл салдарынан алты адамның қаза тапқанын хабарлағаннан кейін жарияланды.
Брянск облысы губернаторының міндетін атқарушы Егор Ковальчуктың айтуынша, Белая Берёзка ауылына жасалған артиллериялық шабуыл салдарынан бір адам қаза тауып, бір адам жараланған. Сондай-ақ шабуыл кезінде бірнеше көпқабатты тұрғын үй мен қоғамдық нысандарға зақым келгені хабарланды.
Дрон соғысы күшейіп келеді
Ресей бақылауындағы Донецк облысында Ресей тағайындаған қала басшысы Иван Горловкиннің мәліметінше, Украинаның дрон шабуылы салдарынан екі бала мен екі ересек адам қаза тапқан.
Ресей Қорғаныс министрлігі әуе шабуылына қарсы қорғаныс жүйелерінің аннексияланған Қырыммен қатар 14 өңірдің әуе кеңістігінде 173 дронды жойғанын мәлімдеді.
Ал Украина Қарулы күштері Бас штабы Ресейдің түн ішінде 262 дрон ұшырғанын, олардың 246-сы атып түсірілгенін немесе залалсыздандырылғанын хабарлады.
Харьков облыстық әскери әкімшілігінің басшысы Олег Синегубовтың айтуынша, Ресей күштері соңғы 24 сағат ішінде Харьков қаласы мен облыстағы 21 елді мекенге дрондармен шабуыл жасаған. Салдарынан бір бала мен 17 ересек адам жараланған.
Ресейдің Сумы облысына жасаған шабуылынан бір адам қаза тауып, төрт адам жараланған.
Соғыс жағдайына байланысты тараптардың мәлімдемелерін тәуелсіз түрде растау мүмкін болмай отыр.
