Цукерберг қысқартуға ұшыраған қызметкерлерге алғыс айтып, жасанды интеллекттің маңыздылығына тоқталды. Қызметкерлерге 2026 жылы қосымша қысқарту толқыны болмайтынына кепілдік берген Цукерберг болашаққа қатысты көзқарасын да жеткізді. Компания қысқартулармен қатар 7 мың қызметкерін жасанды интеллект бөлімдеріне бағыттап жатыр.
Цукерберг: «Алайда табысқа кепілдік жоқ», – деп ескертіп, жасанды интеллекттің қазіргі кезеңдегі ең маңызды технология екенін және осы салада көшбасшы болған компаниялар болашақ ұрпақты қалыптастыратынын айтты.
Қайта құрылымдау сәуір айында жарияланған болатын
Өткен айда алдағы қысқартуларға қатысты тараған мәліметтер “Meta” басшылығының 2026 жылдың бірінші тоқсаны бойынша табыс есебі алдында шамамен 10 пайыздық қысқартуға дайындалып жатқанын жариялауына себеп болды.
Компанияның сәуір айындағы ішкі жазбасында егжей-тегжейі жарияланған қайта құрылымдау шамамен 8 мың қызметкерді жұмыстан шығаруды және бос тұрған шамамен 6 мың орынды толтырмауды қамтиды. Құрылымдау аясында жұмыстан шығарылған қызметкерлерге сәрсенбі күні хабар берілді.
Жасанды интеллектке салынған инвестициялар бюджетті арттырды
“Meta” сәуір айында жоғары құрамдас бөлшек бағалары мен болашақтағы қуатты қолдайтын қосымша деректер орталығының шығындарына байланысты 2026 жылғы капиталдық шығындарын 125 миллиард пен 145 миллиард доллар аралығына көтергенін жариялады.
Саланың өте серпінді кезеңнен өтіп жатқанын айтқан Цукерберг компанияны дарынды адамдар ең үлкен ықпал жасай алатын орынға айналдыру үшін өзгертіп жатқандарын мәлімдеді. Компаниядан кеткен қызметкерлерге ризашылығын білдірген Цукерберг бұл үдерісте қалағандарынша ашық бола алмағандарын және мұның әлі де жетілдіруді қажет ететінін қосты.
АҚШ-та жұмыстан шығарылған қызметкерлерге еңбек өтіліне байланысты төрт айлық жалақыға қоса қосымша өтемақы төленеді. Сонымен қатар медициналық сақтандыру және иммиграциялық мәртебелері бойынша да қолдау көрсетіледі.
