Түркия Республикасы президенті жанындағы Коммуникация басқармасының “Nsosyal” желісіндегі мәлімдемесіне сәйкес, әңгіме барысында Түркия мен АҚШ арасындағы екіжақты қатынастар, сондай-ақ өңірлік және жаһандық мәселелер талқыланған.
Президент Ердоған өңірдегі қақтығысқа қатысты атысты тоқтату мерзімін ұзарту туралы шешімді оң қадам ретінде бағалайтынын айтып, даулы мәселелер бойынша ақылға қонымды шешімге қол жеткізуге болатынына сенетінін және ұсынылған сындарлы бастамаларды қолдау жалғасатынын жеткізді.
Ердоған Сирияда тұрақтылықтың орнығуы бүкіл өңір үшін маңызды жетістік екенін атап өтіп, Түркияның Сирияға көрсететін қолдауы үздіксіз жалғасатынын мәлімдеді. Сонымен қатар ол Ливандағы жағдайдың нашарлауына жол бермеу қажет екенін айтты.
Президент Ердоған НАТО-ның Анкара саммитіне дайындық жұмыстары жалғасып жатқанын және саммиттің барлық тұрғыдан табысты өтуі үшін барынша күш жұмсалып жатқанын білдірді.
Сондай-ақ Ердоған АҚШ президенті Трампқа бірнеше күн бұрын АҚШ-тың Сан-Диего қаласындағы мешітке жасалған жантүршігерлік шабуылға байланысты көңіл айтты және Түркияның барлық діни топтарға өшпенділік сипатындағы қылмыстарға қарсы екенін жеткізді.
