Түркияның Көлік және инфрақұрылым министрі Абдулкадир Уралоглу «EUROCONTROL» ұйымының 17 қыркүйекте жарияланған Еуропадағы әуе қатынасына шолу есебіне қатысты пікір білдірді.
Уралоглу есепке сәйкес Стамбул әуежайының Еуропада көшбасшы екенін атап өтті.
«Стамбул әуежайында 7–13 қыркүйек аралығында тәулігіне орта есеппен 1643 рейс орындалып, ол Еуропадағы ең көп рейс орындалатын әуежай болды. Екінші орында 1413 рейспен Амстердам және 1407 рейспен Париждегі Шарль де Голль әуежайы бар», – деді ол.
Министр Стамбул әуежайындағы әуе қозғалысының өткен жылдың осы кезеңімен салыстырғанда 3 пайыз артқанын атап өтті. Сондай-ақ Анталья әуежайы тәулігіне орта есеппен 969 рейспен Еуропадағы рейс көп орындалатын 10 әуежайдың қатарына енгенін мәлімдеді.
Әлемдегі ең көп рейс орындалатын 5 әуежайдың қатарында
Уралоглу Стамбул әуежайының әлемдік деңгейде де маңызды орынға ие болғанына назар аударып, сөзін былай жалғастырды:
«Стамбул әуежайы 7–13 қыркүйек аралығында тәулігіне орта есеппен 829 ұшу көрсеткішімен әлем бойынша 5-орынға ие болды. Осылайша әуежайымыз әлемдегі ең қарқынды 5 әуежайдың қатарына енді».
Уралоглу елдер бойынша әуе қозғалысы көрсеткіштеріне де тоқталып, Түркияның тәулігіне орта есеппен 4 мың 191 рейспен Еуропадағы әуе қозғалысы ең қарқынды елдер арасында 6-орында тұрғанын айтты.
Сондай-ақ елдегі тәуліктік орташа әуе қозғалысының өткен жылдың осы кезеңімен салыстырғанда 2 пайыз артқанын мәлімдеді.
