Сыртқы істер министрі Хакан Фидан: «Біз Грекияның аймақты тұрақсыздандырғысы, хаосқа сүйрегісі келетіндердің ойыншығына айналғанын қаламаймыз. Дұрыс көршілік қарым-қатынаста болғымыз келеді», — деді.
Хакан Фидан баспасөз өкілдеріне сыртқы саясат бойынша мәлімдеме жасады.
Грекиямен қарым-қатынастар туралы Фидан: «Біз Грекияның аймақты тұрақсыздандырғысы, хаосқа сүйрегісі келетіндердің ойыншығына айналғанын қаламаймыз. Дұрыс көршілік қарым-қатынаста болғымыз келеді», — деп, әсіресе қауіпсіздікке қатысты түсініспеушіліктердің екіжақты түрде алдын алу қажеттігіне тоқталды.
Аралдардың қаруландырылуы мәселесінде Түркияның өте маңызды сезімталдық танытып отырғанын атап өткен Фидан: «Олар бұны біледі, бұл ұстанымымызды жеткіздік. Әсіресе қару-жарақсыз мәртебесі бар аралдардың қаруландырылуы біз үшін қауіп. Әрине ол жақта сайлау процесі де бар. Грек саясатында Түркияға қарсылық тарихи түрде кең тараған», — деген сөздерге орын берді.
Фидан: «Біздің ең көп назар аударатын мәселелеріміздің бірі — халықаралық шарттармен әскерилендірілмеген мәртебе берілген және бұл мәртебесі даусыз түрде сақталуы тиіс аралдарда Грекияның келісімшарттық міндеттемелеріне қайшы келетін кейбір әрекеттерге баруы», — деп, мұның 1960 жылдардан бері болып келе жатқанын және бір-бірімен байланысты Эгей проблемаларының маңызды бөлігін құрайтынын атап өтті.
Түркияның 1960 жылдардан бері қажетті реакцияны білдіріп келе жатқанын баса айтқан Фидан қажет болған жағдайда екіжақты арналар арқылы Грекияға ескертулер мен наразылықтардың жеткізілетінін, ал қажет болғанда НАТО-да Түркияның ұстанымы білдіріліп, бұл мәселенің Біріккен Ұлттар Ұйымына ұсынылатынына назар аудартты.
Сыртқы істер министрі: «Көршіміз әрі одақтасымыз Грекияны одақтастық рухына сай, ақылға қонымды түрде келісімшарттық міндеттемелерін орындауға шақырамыз. Айналамызда қауіпсіздік саласында осындай сын-қатерлер көп болып тұрғанда Грекия олардың қатарына жаңасын қоспауы тиіс», — деген тіркесті қолданып, соңғы кезеңде басталған шешімге бағытталған оң атмосфераны дамыта отырып сақтау қажеттігін білдірді.
