Әзербайжан Сыртқы істер министрі Джейхун Байрамов өз елі мен Түркияның «талай онжылдыққа» арналған жаңа жобалар бойынша тығыз үйлесімде жұмыс істеп жатқанын білдірді.
Сейсенбі күні Бакуде түрік әріптесі Хакан Фиданмен өткізген кездесуден кейін ұйымдастырылған бірлескен баспасөз мәслихатында сөйлеген Байрамов келіссөздердің басты тақырыбы «стратегиялық маңызымен ерекшеленетін дәстүрлі секторлар» болғанын айтты.
Энергетика секторына ерекше тоқталған Байрамов Баку-Тбилиси-Джейхан құбыры жобасы мен Оңтүстік газ дәлізін жүзеге асыру және пайдалану Әзербайжан мен Түркияның, сондай-ақ «кең географиялық аймақтың» энергетикалық қауіпсіздігіне «орасан зор» үлес қосқанын атап өтті.
Байрамов: «Қазіргі кезеңде талай онжылдыққа арналған орасан зор мүмкіндіктер мен үлкен әлеуетті қамтитын жобалар бар деп сенеміз және бұл жобалар бойынша екі ел арасында тығыз үйлесімділікпен жұмыс жүргізілуде», — деді.
Байрамов бұл жобалардың арасында әсіресе баламалы энергетика саласындағы жұмыстардың алдыңғы қатарда тұрғанын білдіріп, Әзербайжанда өндірілетін жасыл энергияны Қаратеңіз арқылы Еуропаға жеткізу және бұл жобада Түркияның орын алуы талқыланғанын айтты.
Әзербайжан-Грузия-Түркия-Болгария арқылы жаңа энергетикалық кабель тарту және Нахчыванды Түркияға жалғайтын жаңа энергетикалық кабель жобаларының да күн тәртібінде екенін жеткізген Байрамов былай деді: «Бұл жобаларды жүзеге асыру арқылы жасыл энергетика саласында екі елдің қатысуымен тек Әзербайжан мен Түркия елдері мен нарықтары үшін ғана емес, Түркия арқылы баламалы энергетиканы жеткізуде Еуропа нарығы үшін де өте үлкен әлеуетке ие жаңа бағыттар пайда болады».
Байрамов Фиданмен Әзербайжанның көпжақты платформалардағы қызметіне қатысты ауқымды келіссөздер жүргізгенін және Түркі Мемлекеттері Ұйымы (ТМҰ) сияқты түрлі платформалар аясындағы екіжақты ынтымақтастықтың арнайы талқыланғанын білдірді.
ТМҰ-ның кезекті саммиті келесі айда Түркияда өтетінін еске салған Байрамов аталған кездесуге дайындық барысы бойынша нәтижелі келіссөз жүргізілгенін және ұйымның екі ел үшін де «ерекше маңызға» ие екенін атап өтті.
Әзербайжандық министр: «COP29 төрағалығын атқарған еліміз жуырда COP31 жиынын өткізетін Түркияға толық қолдау білдіреді. COP29 шарасына қатысқан және содан бері климаттық дипломатияда белсенді рөл атқарып келе жатқан бүкіл тобымыз дайындық кезеңінде де, шараның өзінде де COP31-дің сәтті өтуіне өте белсенді рөл атқаратын болады», — деді.
Байрамов Фиданмен Оңтүстік Кавказ пен Таяу Шығыстағы жағдай туралы да пікір алысқандарын білдірді.
Баку мен Анкараның аймақтық байланыс бойынша қабылдаған шараларына тоқталған Байрамов Әзербайжанда жаңа көлік инфрақұрылымын құру жұмыстарының қарқынды жүріп жатқанын айтты.
Осы орайда Байрамов Әзербайжанның негізгі аумағынан көрші Армения шекарасына дейін созылатын автомобиль жолдарының шамамен 95 пайызы аяқталғанын, ал теміржол құрылысында 75 пайыздық кезеңге жеткенін білдірді.
Байрамов Нахчывандағы теміржол қатынасын қайта құру жұмыстарының өмірлік маңызы бар екенін және бұл бағыттағы қызметтің басталып кеткенін атап өтті.
Сыртқы істер министрі Халықаралық бейбітшілік пен өркендеуге арналған Трамп бағыты (TRIPP) жобасының Армения территориясы арқылы өтетін 42 шақырымдық бөлігіне қатысты Ереван мен Вашингтон арасында тікелей келіссөздер жүргізіліп жатқанын және АҚШ-тың бұл мәселеде Әзербайжанды жүйелі түрде ақпараттандырып отырғанын айтты.
Бұл бөлікті «жетіспейтін буын» деп сипаттаған Байрамов бұл бағыттың аяқталуымен Еуропаны Түркия мен Әзербайжан арқылы Орталық Азияға жалғайтын «маңызды әрі жаңа көлік дәлізінің» пайда болатынына назар аударды.
