Армения премьер-министрі Никол Пашинян елдің энергетикалық стратегиясын қайта қарау барысында Әзербайжанмен қатар көршілес мемлекеттермен электр энергиясы саудасын дамытуға дайын екенін мәлімдеді.
Никол Пашинян журналистерге берген сұхбатында жасанды интеллект саласына салынатын инвестициялар Арменияның энергияға деген қажеттілігін арттыруы мүмкін екенін, сондықтан энергетикалық стратегияға жаңа жағдайларға сәйкес өзгерістер енгізу қажет екенін айтты.
Ол елде күн электр станциялары мен энергия сақтау нысандарын дамытуға басымдық беріліп отырғанын айтып, энергетикалық тәуелсіздік негізгі стратегиялық бағыт ретінде белгіленгенін атап өтті.
Пашинян халықаралық энергия саудасынан толықтай бас тартпайтындарын айтып, «Қажет болған жағдайда электр энергиясын экспорттай аламыз, қажет болса импорттаймыз. Бұған Әзербайжанмен электр энергиясын импорттау және экспорттау бағытындағы ықтимал ынтымақтастық та кіреді. Түркия, Иран, Грузия және басқа да барлық көрші елмен болғандай», – деді.
Пашинян Әзербайжан мамандарының Арменияға барғанын растады. Оның айтуынша, екі ел арасында инфрақұрылым мәселелері бойынша екіжақты жұмыстар жүргізіліп жатыр.
«Жақын уақытта Әзербайжанға да экспорт басталатынына сенімдімін»
Екі ел арасындағы өзара тауар саудасы да күн тәртібінде тұрғанын айтқан Пашинян: «Өзара тауар саудасы күн тәртібінде. Жақын уақытта Армениядан Әзербайжанға да экспорт басталатынына сенімдімін», – деді.
Әзербайжан президенті Ильхам Әлиев екі күн бұрын «AZTV» арнасына берген сұхбатында Арменияға электр энергиясын экспорттай алатындарын, сондай-ақ Армения аумағында электр бағандары орнатылатын орындардың әзербайжандық мамандар жүргізген зерттеу нәтижесінде анықталғанын мәлімдеген еді.
