«SANA» ақпарат агенттігінің мәліметінше, Дамаскідегі Қорғаныс министрлігі ғимараттарының біріне жақын маңда болған жарылыстан сириялық бір сарбаз қаза тауып, бірнеше әскери қызметкер жарақат алған.

Сирия Қорғаныс министрлігінің БАҚ және қоғаммен байланыс бөлімі сейсенбі күні «SANA» агенттігіне жасаған мәлімдемесінде әскери бөлімше Дамаскінің Баб Шарки ауданындағы министрлік ғимараттарының біріне жақын жерде жару үшін дайындалған жарылғыш құрылғы тауып алғанын хабарлады.

Дереккөзге сүйенсек, қауіпсіздік күштері құрылғыны залалсыздандыру және жою үшін шұғыл әрекет еткен, дәл осы маңда басқа бір көлікке қойылған бомбаның жарылуы салдарынан бір сарбаз мерт болып, бірнешеуі жараланған.

Дамаскідегі жедел жәрдем және шұғыл қызметтердің басшысы Наджиб әл-Наасан «Alikhbariah» телеарнасына берген сұхбатында жарылыстан бір адам көз жұмып, 12 адамның жарақат алғанын мәлімдеді.

Әзірге ешбір топ бұл лаңкестік әрекетті өз мойнына алған жоқ.