«Шекара асқан дәрігерлер» ұйымы Конго Демократиялық Республикасында (КДР) соңғы алты айда жалғасып жатқан Эбола індетінен қаза тапқандар саны 5 мыңнан, ал ауру жұқтырғандар саны 11 мыңнан асқанын хабарлап, шұғыл шара қабылдауға шақырды.
«Шекара асқан дәрігерлер» ұйымы КДР-де алты айдан бері жалғасып жатқан Эбола індетіне қатысты жаңа есеп жариялады.
Есепте КДР тарихында тіркелген екінші ірі Эбола індетінің әлі де бақылауға алынбағаны ескертілді. Сондай- ақ құжатта індетпен күресуге жұмылдырылған ауқымды ресурстар мен науқастарға, жергілікті қызметкерлерге және қауымдастықтарға іс жүзінде көрсетіліп жатқан көмек арасында үлкен айырмашылық бар екені атап өтілді.
Есепте: «Қолда бар ресурстардың көмек аса қажет аймақтарда тиімді әрі үйлестірілген іс-шараларға жұмсалуын қамтамасыз ету үшін шұғыл әрекет ету қажет. Халықаралық қауымдастық жүздеген миллион доллар көлемінде қаржы бөлгеніне қарамастан індетке қарсы күрестің негізгі бағыттарында әлі де елеулі кемшіліктер бар. Бұл жағдай індетті бақылауға алу және адамдардың өмірін сақтап қалу әрекеттеріне кедергі келтіріп отыр», – деп ескертілді.
Есепте ауру жұқтырғандар саны 11 мыңнан, ал қайтыс болғандар саны 5 мыңнан асқаны айтылып, шұғыл шаралар қабылдауға үндеу жасалды.
Есепте: «КДР мен Біріккен Ұлттар Ұйымының мекемелері қазірдің өзінде жұмылдырылған ресурстардың індетке қарсы тиімді күреске бағытталуын қамтамасыз етуі тиіс. Ол үшін бақылау мен есеп берушілікті күшейту, жергілікті жерлерде жұмыс істейтін қызметкерлерді тиісті деңгейде оқыту, олардың еңбекақысын төлеу, қажетті құрал-жабдықтармен қамтамасыз ету және қолдау көрсету қажет», – делінген.
