Калифорния Сан-Диего университетінің (UCSD) инженерлері мен хирургтарынан құралған топ екі аяқты гуманоид (адам тәріздес) роботтардың ота жасаудағы тиімділігін тексерді.

Зерттеушілер ең алдымен роботтардың ұсақ моторикалық дағдылары мен хирургиялық құралдарды пайдалану қабілеттерін жансыз нысандарда сынап көрді. Сынақтан сәтті өткен роботтар кейін жансыздандырылған шошқаларға жасалған жабық өт қабын алып тастау отасына қатыстырылды.

Қашықтан хирург басқарып отырған роботқа ота үстелінің жанында тағы бір дәрігер ассистенттік етті. Ота кезінде екінші гуманоид робот та қысқа мерзімге процеске араласып, ота сәтті аяқталды.

Лапароскопиялық хирургияда «da Vinci» сияқты стационарлық роботтандырылған жүйелер ұзақ уақыттан бері қолданылып келсе, бұл зерттеуде алғаш рет адам тәріздес робот ота жасады.

“Nature” журналында жарияланған зерттеуде адам тәріздес роботтардың күрделі оталарда хирургтарға қолдау көрсете алатыны атап өтілді.

Мүмкіндігі шектеулі аймақтарда және ғарышта қолданылуы мүмкін

Дәстүрлі роботтандырылған хирургиялық жүйелермен салыстырғанда аз орын алатын және тасымалдауға жеңіл адам тәріздес роботтардың білікті дәрігерлер тапшы аймақтарда қашықтан ота жасау мүмкіндігін ұсына алатыны айтылды.

Сарапшылар қашықтан басқарылатын бұл роботтардың қауіпті аймақтарда, медициналық мүмкіндіктері шектеулі елді мекендерде және тіпті ғарыш миссияларында маңызды рөл атқара алатынын айтады.