Өнеркәсіп және технология министрі Мехмет Фатих Кажыр Ай жобасы аясындағы мерзімнің нақтыланғанын мәлімдеп, «Гибридті қозғалтқыш зымыран жүйесімен жабдықталған Ай аппаратымызды 2027 жылдың алғашқы айларында ғарышқа ұшырамыз», - деді.
Министр Кажыр Афьонкарахисардағы Емре көлінде өткен 28-ші TÜBİTAK Аспанды бақылау іс-шарасында БАҚ өкілдеріне мәлімдеме жасады.
Кажыр Түркияның Ұлттық технологиялық серпіліс бастамасында ғарыш саласының аса маңызды орын алатынын атап өтіп, ғарыш пен ғарыш технологиялары қорғаныс өнеркәсібі сияқты маңызды салалар үшін де стратегиялық инфрақұрылым қалыптастыратынын айтты.
Президент Режеп Тайып Ердоғанның басшылығымен аса маңызды жұмыстар жүзеге асырылғанын атап өткен Кажыр спутниктік технологиялар саласында “BİLSAT”, “RASAT”, “GÖKTÜRK-2”, “Türksat 6A” және “İMECE” жобалары арқылы елеулі мүмкіндіктерге қол жеткізілгеніне назар аударды.
Ғарышқа тәуелсіз қол жеткізу Түркия үшін стратегиялық мақсат екенін айтқан Каджыр елдің зымыран және зымырандық технологиялар саласында айтарлықтай мүмкіндіктерге ие екенін жеткізді.
“ROKETSAN”, “TÜBİTAK SAGE” және “Delta V” компанияларының да бұл бағытта маңызды жұмыстар жүргізіп жатқанын атап өткен Кажыр сөзін былай жалғастырды:
«Бұл жұмыстардың нәтижесінде өз спутниктерімізді өз мүмкіндігімізбен ғарышқа шығаратын зымырандарды өндіру деңгейіне біртіндеп жақындап келеміз. Ғарышқа тәуелсіз қол жеткізу үшін ғарыш айлағы инфрақұрылымына ие болуды да басым бағыттардың бірі ретінде қарастырып отырмыз».
