Билік өкілдері “SpaceX” компаниясының АҚШ-тың Луизиана штатында «әлемдегі ең ірі ғарыш айлағына» айналады деп жоспарланып отырған нысанды тұрғызуға 100 миллиард доллар инвестиция салатынын мәлімдеді.
Луизиана Экономикалық даму агенттігінің сейсенбі күнгі мәлімдемесіне сәйкес, нысан Вермилионда бой көтеріп, жылына мыңдаған ұшыруды қамтамасыз етуге бейімделеді.
Жоба алдағы 10 жыл ішінде 3 000 тікелей жұмыс орнын ашып, орташа жылдық жалақы 92 600 долларды құрайды деп болжануда.
Сонымен қатар 8 100-ден астам жанама жұмыс орны ашылып, жалпы жұмыспен қамту мүмкіндіктерінің саны 11 100-ден аспақ.
«Бүгін — Луизиана үшін аса маңызды күн», - деді губернатор Джефф Лэндри. Ол бұл жоба штатты ғарыштық ұшулардың жаңа дәуірінің орталығына айналдыратынын атап өтті.
Бұл нысан “SpaceX” компаниясының төртінші әрі ең ірі ұшыру орталығы болады және компанияның толықтай қайта пайдалануға болатын жаңа буын зымыран жүйесі — “Starship” қатысатын миссияларды кеңейтуде негізгі рөл атқарады.
Толық қуатына шыққан кезде нысанда әрқайсысы екі ұшыру алаңы мен зымыран отынына арналған алаңнан тұратын бес ұшыру кешені болады деп жоспарланып отыр.
Құрылыс 2027 жылы басталады деп жоспарлануда
Жоспарда сондай-ақ зымыран отынын өндіретін кәсіпорын, энергия өндіру инфрақұрылымы, ғарыш аппараттарын дайындау нысандары және қызметкерлер мен олардың отбасыларына арналған тұрғын үйлер қарастырылған.
«Біз осы уақытқа дейін тек ғылыми-фантастикалық шығармаларда ғана болған ғарыш айлағын тұрғызуға дайындалып жатырмыз», - деді “SpaceX” компаниясының негізін қалаушы әрі бас директоры Илон Маск.
Маск “Starbase Louisiana” деп аталатын нысан ғарыш сапарларын әуе қатынасы секілді қалыпты әрі жүйелі құбылысқа айналдыру мақсатына қызмет ететінін айтты.
Құрылыс жұмыстары 2027 жылы басталып, алғашқы ұшыру 2029 жылға жоспарланып отырғаны хабарланды.
Луизиана билігінің мәлімдеуінше, таңдалған аумақта табиғи газ қоры мол, болашақта кеңеюге жеткілікті жер бар және Мексика шығанағы жағалауындағы ұшыру бағыттарына шығуға мүмкіндік мол.
Нысан орбиталық деректер орталықтарын, кеңейтілген спутниктік интернет байланысын, сондай-ақ болашақтағы Ай мен Марсқа ұшатын миссияларды қолдайды деп болжануда.
Жергілікті салық органдарымен жасалған келісімге сәйкес, “SpaceX” Вермилионға 25 жыл бойы жыл сайын 25 миллион доллар төлейді. Бұған қоса біржолғы 20 миллион доллар төлем жасалады. Осы келісім аясында тікелей төлемдер көлемі 820 миллион доллардан аспақ.
Компания сондай-ақ “Acadiana Community Foundation” қорына 25 миллион доллар қайырымдылық жасап, талаптарға сай келетін Вермилион тұрғындарына “Starlink” интернет тарифтеріне 50 пайыздық жеңілдік ұсынады.
