Еуропалық Одақ басып алынған Палестина аумақтарындағы Израиль қоныстарының халықаралық құқыққа сәйкес заңсыз екенін тағы бір мәрте атап өтіп, оларды бейбітшілікке қол жеткізуге және екі мемлекет қағидатына негізделген шешімді жүзеге асыруға үлкен кедергі деп атады.
Еуропалық комиссияның сыртқы істер жөніндегі өкілі Ануар әл-Ануни: «Ұлыбритания, Канада, Исландия және Норвегиямен бірге ЕО-ға мүше сегіз елдің заңсыз қоныстармен сауда жасауға қатысты ұлттық шектеулер енгізу туралы шешімін назарға алып отырмыз. ЕО-ның көптен бергі ұстанымы айқын: қоныстар халықаралық құқыққа сәйкес заңсыз саналады. Олар бейбітшілікке және екі мемлекет қағидатына негізделген шешімнің жүзеге асырылуына кедергі келтіреді», – деп мәлімдеді.
Еуропалық Одақ 1967 жылғы маусымнан кейін басып алынған Палестина аумақтарында құрылған Израиль қоныстарын заңсыз деп таныған.
Әл-Ануни аталған қоныстардан әкелінетін тауарларға ЕО мен Израиль арасындағы сауда келісімдері шеңберінде қарастырылған жеңілдікті тарифтер қолданылмайтынын атап өтті.
Франция, Ұлыбритания, Дания, Испания, Финляндия, Ирландия, Исландия, Норвегия, Польша, Португалия және Швеция, сондай-ақ Канада Израиль қоныстарымен саудаға ұлттық деңгейде шектеулер енгізуді және Еуропа ауқымындағы неғұрлым кең шараларды қолдауды жоспарлап отырғандарын мәлімдеді.
Ортақ мәлімдемеде бұл елдер қоныстанушылар тарапынан жасалатын зорлық-зомбылықтың күшеюіне және заңсыз қоныстардың одан әрі кеңеюіне назар аударып, басып алынған Батыс Шериядағы жағдайдың нашарлап бара жатқанын атап өтті.
