Украина президенті Владимир Зеленский «Axios» басылымына берген сұхбатында АҚШ қыста соғыстың қарқынын бәсеңдетуге және сонымен бірге ауқымды бейбіт келісім жөніндегі келіссөздерді қайта жандандыруға бағытталған ықтимал қадамдарды қарастырып жатқанын айтты.

Зеленский дүйсенбі күні жасаған мәлімдемесінде Ресей президенті Владимир Путин АҚШ-тағы аралық сайлау алдында АҚШ президенті Дональд Трамппен қарым-қатынасты шиеленістірмеуге тырысуы мүмкін екенін алға тартып, алдағы апталар дипломатия үшін қолайлы мүмкіндік болуы ықтимал екенін атап өтті.

«Мен Путинге Трамп керек деп ойлаймын. Ол оны... ашуландырғысы келмейді», – деді Зеленский. «Путин сайлауға дейін Трамптың дипломатиялық жетістікке қол жеткізуіне жағдай жасауға тырысуы мүмкін бе?»,- деген сұраққа Зеленский: «Иә», – деп жауап берді.

Зеленский жексенбі күні Киевте Стив Уиткофф және Джаред Кушнермен кездесті. Бұған дейін олар Мәскеуде Путинмен үш сағаттық келіссөз өткізген еді.

Жаңа ұсыныстар

Зеленский АҚШ делегациясының ең алдымен дипломатиялық үдеріске жол ашу мақсатында Мәскеу мен Киевке барғанын, сондай-ақ қыс қарсаңында және қыс бойы шиеленісті бәсеңдетуге бағытталған ықтимал шараларды қамтитын жаңа ұсыныстар ұсынғанын айтты.

«Энергетика нысандары мен астық тасымалына, электр инфрақұрылымына, сондай-ақ мұнай мен газ экспортына қатысты түрлі ұсыныстар бар. Ресей мен біздің мүдделеріміз әртүрлі», – деді Украина президенті.

Оның айтуынша, АҚШ ұсынып отырған жаңа тәсіл келіссөздерді қайта бастауға және қыс айларында жағдайдың күрт шиеленісуіне жол бермейтін тетіктерді қарастыруға бағытталған. Зеленский мұндай түсінік осы келіссөздердің шынайы мазмұнына өте жақын екенін атап өтті.