Ливанның NNA мемлекеттік агенттігінің хабарлауынша, дүйсенбіге қараған түні Израильдің Ливанның оңтүстігіне жасаған әуе соққыларынан кемінде 11 адам, оның ішінде екі сәби қаза тауып, бес адам жараланды.
Ең көп адам шығыны Набатия маңындағы Кфар-Румман елді мекенінде болды. Түн ортасынан кейін жасалған соққыдан үш қабатты тұрғын үй толығымен қирады.
Құтқарушылар үйінді астынан екі сәбиді қоса алғанда тоғыз адамның денесін шығарды. Бес адам жараланды.
Қаза тапқандар арасында жедел жәрдем қызметкерлері де бар
Ливанның “Al Mayadeen” телеарнасының хабарлауынша, Израиль армиясы Кефр-Румманда жедел жәрдем көлігін тікелей нысанаға алды. Шабуылдан бір жедел жәрдем қызметкері қаза тауып, көліктегі екі адам жараланды.
Жергілікті БАҚ қаза тапқан қызметкердің Әли Шахрур есімді жас жігіт екенін хабарлады.
Шабуылдан кейін оқиға орнына келген топтар жараланғандарды ауруханаға жеткізді. Ресми органдар әзірге шабуылға қатысты мәлімдеме жасаған жоқ.
