Франция президенті Эммануэль Макрон 17 қазанда тонау мен зорлық-зомбылық оқиғаларына ұласқан «Сары жилеттілер» қозғалысының наразылық акцияларынан кейін қауіпсіздік шаралары күшейтілген елде кәсіподақтардың бастамасымен ұйымдастырылмаған барлық шеруге тыйым салынатынын мәлімдеді.
Франция президенті Эммануэль Макрон Елисей сарайында Қауіпсіздік кеңесінің отырысы басталар алдында журналистерге мәлімдеме жасады.
«Алдағы күндер мен апталарда кәсіподақ ұйымдарының бастамасымен өткізілмейтін наразылық акцияларына тыйым салынады», – деді Макрон.
Сонымен қатар президент кәсіподақтар ұйымдастыратын шерулердің бағыттары да арнайы қаралатынын атап өтті.
«Жалпы ұстаным – алдағы күндері наразылық акцияларының өткізілуіне жол бермеу. Егер шеру ұйымдастырғысы келетіндер кәсіподақ ұйымдары болса, жергілікті билік оларға балама бағыттар ұсынады», – деді ол.
Макрон бұл шаралардың кәсіпорындар мен жұмыс орындарын қорғау мақсатында қабылданып жатқанын түсіндірді.
Алайда солшыл партиялардың депутаттары мұндай тыйым салу шешімдері авторитарлық режимдерге тән екенін айтып, Макронның бастамасын сынға алды.
Үкімет өкілі Мод Брежон болса, президенттің шешімі «құқықтық мемлекет қағидаттары аясында» қабылданғанын мәлімдеді. Оның айтуынша, жергілікті билік органдары қоғамдық тәртіпке елеулі қауіп төндіруі мүмкін наразылық акцияларына тыйым салуға құқылы.
Осы арада Луара департаментінің әкімшілігі Орлеан қаласында, ал Рона департаментінің әкімшілігі Лионда демалыс күндері жоспарланған барлық шеруге тыйым салынатынын хабарлады.
Париж әкімшілік соты ел астанасы орналасқан Иль-де-Франс аймағындағы жоғары оқу орындарының өкілдерін біріктіретін “Interfac” ұйымының бүгін өткізуді жоспарлаған шеруіне Париж полициясы енгізген тыйымның күшін уақытша тоқтатты.
Жергілікті бұқаралық ақпарат құралдарының хабарлауынша, сот шешімінен кейін университет студенттері Питье-Сальпетриер ауруханасы мен Бастилия алаңы арасындағы шеру өтетін аумаққа жинала бастаған.
Франциядағы наразылық оқиғалары
Студенттер де қолдау көрсеткен «Сары жилеттілер» қозғалысы 17 қазанда ел бойынша тұрмыс құнының қымбаттауы мен жанармай бағасының жоғарылауына қарсы жаппай наразылық акцияларын өткізген болатын.
Шерулер барысында шамамен 2 500 адам ұсталып, полиция, жандармерия және өрт сөндіру қызметтерінің 1 000-нан астам қызметкері жарақат алған.
Зорлық-зомбылық оқиғаларымен қатар жүрген наразылық акциялары кезінде 3 мыңға жуық кәсіпорын мен сауда нысаны бүлінген немесе тоналған.
Шерулер салдарынан кәсіпорындары мен сауда орындары зардап шеккен азаматтар үкіметті дағдарысты тиімді басқара алмады деп айыптап, наразылық білдірген.
Үкімет ықтимал жаңа наразылық акцияларының алдын алу мақсатында Париж, Лилль, Лион, Ницца және Марсель қалаларын қоса алғанда бірқатар өңірде коменданттық сағатты ішінара енгізу туралы шешім қабылдаған.
