Франция Қорғаныс министрлігінің мәліметінше, оқиға кеше жергілікті уақыт бойынша сағат 22:40-та елдің солтүстік-шығысындағы Мёрт-э-Мозель аймағына қарасты Рожевиль елді мекенінде болған. Апатқа Францияның Әуе және ғарыш күштеріне тиесілі “Mirage 2000D” жойғыш ұшағы ұшыраған.
Министрлік ұшақтың Нанси-Оше 133 әскери әуе базасында орналасқан жойғыш авиация эскадрильясының құрамында болғанын және әскери тапсырмадан қайтып келе жатқанда апатқа ұшырағанын хабарлады.
Ұшақ бортында екі адам — ұшқыш пен қару-жарақ жүйелеріне жауапты офицер болған. Іздестіру-құтқару жұмыстары барысында бір адамның мәйіті табылды.
Сондай-ақ апаттың себептерін анықтау үшін сот тергеуі мен ұшу қауіпсіздігіне қатысты тексеру жүргізіліп жатқаны хабарланды.
