2027 жылға арналған орталық мемлекеттік бюджет жобасына сәйкес, Түркия алдағы үш жылда авиация және ғарыш өнеркәсібіне шамамен 2 миллиард доллар бөлуді жоспарлап отыр.
Түркияның осы саладағы халықаралық бәсекеге қабілеттілігін арттыру мақсатында ұлттық ғарыш және авиация бағдарламасының биылғы 176 миллион долларлық бюджетін 2027 жылы 181,7 пайыз ұлғайтып, 495,7 миллион долларға жеткізу көзделген.
Бұл қаржы көлемі 2028 жылы 616,9 миллион долларға, ал 2029 жылы 745 миллион долларға жетуі мүмкін.
Жоспар бойынша әуе тасымалы инфрақұрылымын салуға, пайдалануға және техникалық қызмет көрсетуге шамамен 377,3 миллион доллар қарастырылған.
Ішкі әуе рейстеріне сұраныстың артуына байланысты авиациялық инфрақұрылымға салынатын жалпы инвестиция көлемін 2028 жылы 581,1 миллион долларға, 2029 жылы 596,2 миллион долларға жеткізу жоспарланған.
Түркия келесі жылы әуежайларда транзиттік жолаушыларды қоса алғанда, 272 миллион адамға қызмет көрсетуді жоспарлап отыр. Бұл көрсеткіш 2028 жылы 282 миллионға, ал 2029 жылы 291 миллионға жетуі мүмкін.
Орбиталық инфрақұрылым
Ғарыш саласына бөлінетін қаржының ұлғаюы Түркияның Ұлттық ғарыш бағдарламасын жүзеге асыруға, арнайы ғылыми-зерттеу және сынақ инфрақұрылымын дамытуға, сондай-ақ отандық технологияларды коммерцияландыруға мүмкіндік береді.
Бұл қадам Түркияның соңғы жылдары ғарыш саласында қол жеткізген маңызды жетістіктерінің жалғасы болмақ. Атап айтқанда, елдің алғашқы отандық байланыс серігі «Türksat 6A» мен «İmece» Жерді бақылау серігі ғарышқа ұшырылды.
Сонымен қатар Түркия 2024 жылы Алпер Гезеравджы мен Тува Джихангир Атасевердің қатысуымен алғашқы ғылыми ғарыш миссияларын сәтті жүзеге асырды. Олар ғарышта ғылыми тәжірибе жүргізді.
Түркия келесі жылға жоспарланған Айға алғашқы ғарыш миссиясына дайындықты жалғастыруда. Ал 5–9 қазан аралығында Анталияда 77-Халықаралық астронавтика конгресі (IAC) өтті.
Айға бағытталған миссия аясында бөлшектерінің 80 пайыздан астамы ел ішінде өндірілген, гибридті қозғалтқыш жүйесімен жабдықталған отандық ғарыш аппараты пайдаланылады. Аппаратты құрастыру жұмыстары аяқталып, қазіргі уақытта соңғы сынақтар жүргізілуде.
Сонымен қатар Түркия ғарыш агенттігі ғарышқа өз күшімен әрі тәуелсіз түрде ұшу мүмкіндігін қамтамасыз ету мақсатында Сомалиде ғарыш айлағын салу жұмыстарын жалғастырып жатыр.
