Суданның Солтүстік Кордофан штатында Жедел қолдау күштері жасаған шабуыл салдарынан 5 бейбіт тұрғын қаза тауып, 3 мыңнан астам адам қоныс аударуға мәжбүр болғаны хабарланды.
Судан дәрігерлер желісі таратқан мәлімдемеде ЖҚК жасақтарының Солтүстік Кордофанның Бара қаласының батысындағы Әл-Каа және Әл-Кукити аудандарына шабуыл жасап, үйлер мен жергілікті тұрғындарға тиесілі малды тонағаны айтылды.
Мәлімдемеге сәйкес, шабуыл салдарынан 5 бейбіт тұрғын қаза тауып, әйелдер мен балаларды және қарттарды қоса алғанда 3 мыңнан астам адам үйлерін тастап кетуге мәжбүр болды.
Мәлімдемеде шабуылдардың бейбіт тұрғындарды қоныс аударуға мәжбүрлеу, олардың ауыл шаруашылығы өнімдері мен малын тонауды көздейтіні атап өтілді. Сондай-ақ халықаралық қауымдастық бейбіт тұрғындарды қорғау және қоныс аударғандарға гуманитарлық көмек жеткізу үшін әрекет етуге шақырылды.
ЖҚК әзірге бұл мәселеге қатысты мәлімдеме жасаған жоқ.
Судан үкіметі, сондай-ақ жергілікті және халықаралық ұйымдар бұған дейін де ЖҚК-ні бейбіт тұрғындарға қарсы заң бұзушылықтар жасады деп айыптаған. Алайда ЖҚК бұл айыптауларды жоққа шығарып келеді.
Солтүстік, Батыс және Оңтүстік Кордофан уәлаяттарында қазан айынан бері Судан армиясы мен ЖҚК арасында қақтығыстар жалғасуда.
Суданда 2023 жылдың сәуірінен бері армия мен ЖҚК арасында жалғасып жатқан соғыс салдарынан ондаған мың адам қаза тауып, шамамен 13 миллион адам қоныс аударуға мәжбүр болды.
