Сирия президенті Ахмед Шара АҚШ Сирияны «терроризмді қолдайтын мемлекеттер» тізімінен алып тастағаннан кейін елінің даму, қайта қалпына келтіру және құрылыс кезеңіне қадам басқанын мәлімдеді.
Ахмед Шара “X” әлеуметтік желісіндегі парақшасында жасаған мәлімдемесінде Сирияның қиын күндерді артқа тастап, даму, қайта қалпына келтіру және құрылыс жолына түскенін айтты.
Сирия халқы санкциялардың алынып тасталуы және шектеулердің тоқтатылуы арқылы тағы бір маңызды жетістікке қол жеткізгенін атап өткен Шара: «Алладан сіздерге қызмет ету жолында бізге күш-қуат беруін тілеймін», - деді.
Шара АҚШ президенті Дональд Трампқа, сондай-ақ Сирияның жанынан табылып, еліне қолдау көрсеткен барлық дос әрі қолдаушы мемлекетке алғыс білдірді.
АҚШ Қаржы министрлігі Сирияның 1979 жылы енгізілген «терроризмді қолдайтын мемлекеттер» тізімінен ресми түрде шығарылғанын бұған дейін хабарлаған еді.
Сирияда Башар Асад режимі құлатылғаннан кейін (2024 жылғы желтоқсан) Вашингтон мен Дамаск арасындағы жаңа кезеңге қатысты байланыстар жандана түсті.
Сирияның аталған тізімнен шығарылуы елдің ұзақ жылдар бойы жалғасқан дипломатиялық және экономикалық оқшаулануын азайту жолындағы маңызды қадам ретінде бағаланып отыр.
