Оман Сыртқы істер министрі Бадр әл-Бусаидидің ертең Иран астанасы Тегеранға баратыны хабарланды.

Иранның «IRNA» ресми ақпарат агенттігінің мәліметінше, Сыртқы істер министрлігінің өкілі Исмаил Бекаи Бусаидидің 25 тамызда Тегеранға келетінін мәлімдеді.

Бекаидың айтуынша, Бусаиди сапар барысында Иран Сыртқы істер министрі Аббас Аракчимен кездесіп, екіжақты қарым-қатынастар мен өңірлік мәселелерді талқылайды.

Ол сапар Иран мен Оман арасындағы ынтымақтастықты нығайту және екі ел арасындағы саяси консультацияларды жалғастыру аясында өтетінін айтты. Сондай-ақ Ормуз бұғазына жағалауы бар екі ел өңірдегі бейбітшілік пен қауіпсіздікті нығайту мәселелері бойынша пікір алмасады.

Оман Сыртқы істер министрі Бусаидидің Тегеранға сапары екі ел арасында Ормуз бұғазына қатысты келіссөздер жалғасып жатқан уақытта өтуімен маңызды.