Еуропалық комиссия төрайымы Фон дер Ляйен және Еуропа Кеңесінің төрағасы Антонио Коста Ереванда өткен ЕО-Армения саммитінен кейін баспасөз мәслихатын өткізді.
«Келісім — аты аталғандай келісім және біз оған қол жеткіздік», — деген фон дер Ляйен АҚШ-пен жасалған уағдаластықтың негізінде гүлдену, ортақ ережелер мен сенімділік жатқанын атап өтті.
Фон дер Ляйен қазіргі кезеңде екі тарап та бір-бірінің демократиялық процедураларына құрмет көрсете отырып, аталған келісімді жүзеге асыруы керек екеніне назар аударды.
ЕО тарапы баж салығына қатысты міндеттемелерді орындаудың соңғы кезеңінде тұрғанына назар аударған фон дер Ляйен АҚШ тарапының кейбір уағдаластықтарды әлі аяқтамағанын айтты.
Фон дер Ляйен: «Сондықтан біз бұл келісімнен өзара пайда, ынтымақтастық және сенімділік күтеміз. Біз кез келген сценарийге дайынбыз», — деді.
Еуропа Кеңесінің төрағасы Коста болса «Сауда мәселелеріндегі өкілеттік толығымен Еуропалық комиссияға тиесілі. Мен және 27 мүше ел ЕО Комиссиясы мен оның төрайымының жұмысын толық қолдаймыз», — деп мәлімдеді.
АҚШ президенті Дональд Трамп жұма күні сауда келісімі орындалмады деген уәжбен ЕО елдерінен келетін автокөліктер мен жүк көліктеріне қолданылатын кедендік баж салығын 25 пайызға арттыратынын жариялаған болатын.
АҚШ пен ЕО арасындағы сауда келісімі бойынша келіссөз 2025 жылдың шілде айында Шотландияда аяқталған еді.
Келісім аясында ЕО елдері АҚШ өнімдеріне кедендік тариф қолданбауға келіскен, бұған жауап ретінде АҚШ еуропалық өнімдерге 15 пайыздық тариф қолданатыны хабарланған болатын.
Еуроодақ тарапының жасалған келісімді ратификациялау процесін әлі аяқтай алмауы АҚШ-тың наразылығын тудырды.
