Әзербайжан президенті Ильхам Әлиев АҚШ пен Израильдің Иранға қарсы жалғасып жатқан соғысы кезінде Тегеранға гуманитарлық көмек жіберуді тапсырды.
Әзербайжанның “APA” мемлекеттік ақпарат агенттігінің хабарлауынша, Әзербайжаннан Иранға 10 тонна ұн, шамамен 2 тонна дәрі-дәрмек пен медициналық жабдық, сондай-ақ өзге де гуманитарлық көмек заттары жіберілді.
Бұл көмек жөнелтілімі Әзербайжан мен Иран арасындағы шекаралық қозғалысты қысқа мерзімге бұзған соңғы ұшқышсыз аппарат оқиғасына қарамастан іске асты. Әзербайжан дүйсенбі күні Иранмен шекарадағы өткізу бекеттерін барлық жүк тасымалы үшін қайта ашқанын хабарлады.
Ресейдің “ТАСС” мемлекеттік агенттігінің хабарлауынша, Иранды одақтасы Ресеймен жалғайтын ең қысқа құрлық бағыттарының бірі саналатын бұл өткелдер өткен аптада Бакудың Нахчыван аймағында Иранның дрон шабуылы деп сипаттаған оқиғадан кейін жабылған болатын.
Иран президенті Масуд Пезешкиан жексенбіге қараған түні әзербайжандық әріптесі Ильхам Әлиевке телефон шалып, Әзербайжанға жасалған дрон шабуылына Тегеранның қатысы жоқ екенін айтып, оқиға бойынша тергеу жүргізуге уәде берген.
Әзербайжан билігі бейсенбі күні төрт ұшқышсыз аппараттың Нахчыван аймағында шекарадан асқанын және төрт адамды жаралағанын хабарлаған болатын.
