Тегеран өңірдегі АҚШ нысандары мен мұнай танкерлеріне қатысты қоқан-лоқысын күшейтіп, АҚШ-тың соңғы шабуылдарына жауап ретінде Иорданиядағы АҚШ базасына зымырандар ұшырып, АҚШ-тың екі эсминеціне соққы бергенін мәлімдеді.
Иордания армиясы АҚШ базасын нысанаға алған шабуыл кезінде Ираннан ұшырылған 20 баллистикалық зымыранның 18-ін елдің әуе қорғаныс жүйелері жойғанын растады.
Әскери өкіл қалған екі зымыранның инфрақұрылымға зақым келтірмей ашық аумақтарға құлағанын айтты.
Бұл зымыран шабуылдары Иран Ислам революциясы сақшылар корпусы Иорданиядағы АҚШ әскери базасына, сондай-ақ қанатты зымырандармен және «Aegis» жауынгерлік жүйелерімен жабдықталған АҚШ-тың «DDG-119» және «DDG-53» эсминецтеріне зымыран соққыларын жасағанын хабарлағаннан кейін болды.
«Tasnim» ақпарат агенттігі жариялаған мәлімдемеде Иран Ислам революциясы сақшылар корпусы Иранның мұнай танкерлері мен кемелеріне қарсы жасалған агрессивті әрекеттер мен қасақана арандатуларға қуатты түрде жауап бергенін алға тартып, нысанаға алынған эсминецтер мен АҚШ нысандарына елеулі залал келтірілгенін мәлімдеді.
Порттарға қатысты ескерту
Зымыран шабуылдары Парсы шығанағында теңіздегі қақтығыстар күшейіп жатқан кезеңмен тұспа-тұс келді.
Иранның мемлекеттік «IRIB» телеарнасы растағандай, АҚШ-тың Иран кемелеріне жасаған шабуылдары туралы хабарлардан кейін Иран әскери-теңіз күштері қарымта соққылары кезінде Кувейт пен Бахрейн порттарындағы мұнай танкерлері нысанаға алынуы мүмкін екенін ескертіп, дереу эвакуациялауға шақырды.
«IRIB» жариялаған ресми мәлімдемеде әскери-теңіз күштерінің өкілдері бұл ескертудің АҚШ армиясының Иранға тиесілі бірнеше коммерциялық мұнай танкерін нысанаға алған шабуылдарына тікелей жауап екенін мәлімдеді.
Әскери-теңіз күштерінің қолбасшылығы Кувейт пен Бахрейн порттарында тұрған танкерлердің барлық экипажына кемелерінің әскери операциялардың нысанасына айналуы мүмкін екенін ескертіп, оларды кемелерден дереу кетуге шақырды.
Бұл ескерту «Tasnim» ақпарат агенттігі сейсенбі күні таңертең Парсы шығанағындағы Харг аралынан шамамен 7,4 шақырым жерде Иранның мұнай танкеріне АҚШ зымыранымен соққы жасалғаны туралы хабарлағаннан кейін жасалды.
Ақпарат агенттігінің мәліметінше, зымыран аралдың негізгі айлағына жақын жерде кемені нысанаға алған.
Адам шығыны туралы мәлімет түскен жоқ, экипаж сәтті эвакуацияланды.
Кейінірек «IRIB» АҚШ күштері Парсы шығанағынан тыс жерде, Иранның оңтүстігіндегі Жаск маңында тағы бір ирандық мұнай танкеріне шабуыл жасағанын хабарлады.
