Қырғызстанның ұйытқы болуымен «Күште бірлік, рухта бірлік» ұранымен ұйымдастырылған Дүниежүзілік көшпенділер ойындары Ыстықкөл жағалауындағы Шолпан-Ата қаласында орналасқан Көк бөрү аренасы, Газпром спорт кешені, Еуразия отель спорт алаңы және Қыршын жайлауында 1-6 қыркүйек аралығында өтті.

Ат ойындары, бәйге, ұлттық күрес, тоғызқұмалақ, асық ату, ат үстінен садақ ату, бүркіт және қаршығамен аң аулау, мас-рестлинг пен қол күресі сияқты дәстүрлі 42 спорт түрінен өткен ойындарға 109 елден 3 мыңға жуық спортшы қатысты.

Ресми медальдар кестесінің нәтижесі бойынша Қырғызстан 30 алтын, 29 күміс және 13 қола — жалпы 72 медаль жеңіп алып, ойынды бірінші орында аяқтады.

Ойында екінші орынды 29 алтын, 16 күміс және 19 қола — жалпы 64 медальмен Қазақстан иеленсе, үшінші орынды 7 алтын, 7 күміс және 20 қола — жалпы 34 медаль еншілеген Ресей алды.

Ойындарда жалпы 29 елден келген спортшылар медальға қол жеткізді.