Түркия бойынша мұражай саны 2025 жылы алдынғы жылмен салыстырғанда 4,4 пайыз өсіп, 664-ке, ал мұражайлар мен тарихи орындарға келуші саны 6,8 пайыздық өсіммен 65 миллион 862 мың 639-ға дейін көтерілді.
Түркия Статистика Институты (TÜİK) 2025 жылға арналған «Мәдени мұра статистикасын» жариялады.
Осыған қарағанда, Түркия бойынша мұражай саны өткен жылы 2024 жылмен салыстырғанда 4,4 пайыз өсіп, 664-ке жетті. Бұл мұражайлардың 220-сы Мәдениет және туризм министрлігіне қарасты, 426-сы жеке мұражай санатында болса, Ұлттық сарайлар басқармасына қарасты 18 мұражай жұмыс істеді. Ал тарихи орындар (археологиялық аймақтар) саны 148 болды.
Мұражайлардағы жәдігерлер саны өткен жылы алдыңғы жылмен салыстырғанда 0,4 пайыз өсіп, 4 миллион 12 мың 294 болып тіркелді.
Мұражайлар мен тарихи орындарға келуші саны өткен жылы алдыңғы жылмен салыстырғанда 6,8 пайыз өсіп, 65 миллион 862 мың 639-ға көтерілді. Келушілердің 52,9 пайызы Министрлікке қарасты мұражайлар мен тарихи орындарды аралаған.
Жалпы қорғалатын тарихи-мәдени аймақтар саны 2025 жылы алдыңғы жылмен салыстырғанда 6 пайыз өсіп, 27 мың 703-ке жетті, ал бұл аймақтардың 97,1 пайызын археологиялық аймақтар құрады.
Ұлттық саябақтар саны 2025 жылы алдыңғы жылмен салыстырғанда 2 пайыз артып, 50-ге жетті. Ұлттық саябақ аумағы 3,2 пайыздық өсіммен 942 мың 286 гектарға ұлғайды. Табиғи парктер саны 2,2 пайыз өсіп, 274-ті құраса, табиғи парк аумағы 0,2 пайыздық өсіммен 94 мың 294 гектар болып тіркелді.
