Зерттеушілер шайды ішу жиілігімен қатар оның түрі, қаншалықты қою демделгені және ішу кезіндегі температурасы да маңызды екенін атап өтті.
Зерттеуге 485 мыңнан астам адам қатысты
«Journal of Internal Medicine» журналында жарияланған зерттеу барысында Қытайда тұратын 30 бен 79 жас аралығындағы 485 мыңнан астам адамның деректері талданды. Шамамен 9 жылға созылған бақылау кезінде жүрек-қан тамырлары ауруларына қатысты 14 мың 800-ден астам жағдай тіркелді.
Аптасына кемінде үш күн шай ішетін адамдарда шайды сирек тұтынатындармен салыстырғанда қан тамырлары ауруларының қаупі шамамен 11 пайыз төмен екені анықталды.
Алайда бұл бақылауға негізделген зерттеу болғандықтан, ауру қаупінің төмендеуіне тікелей шайдың әсері дәлелденген жоқ.
Қара шайдың пайдасы басым болды
Зерттеу нәтижесінде қара шай ішу көк шайға қарағанда жүрек-қан тамырлары ауруларының даму қаупінің төмендігімен көбірек байланысты екені анықталды. Сондай-ақ орташа қоюлықта демделген шай ішетін адамдарда да бұл аурулардың пайда болу қаупі төменірек болатыны байқалды.
Алайда шайды өте ыстық күйінде ішетін адамдарда қан тамырлары ауруларына шалдығу қаупі шайды тұрақты ішпейтіндерге қарағанда 16 пайыз жоғары болған.
Мамандар шайдың температурасына қатысты мәліметтер қатысушылардың өз жауаптарына негізделгендіктен, бұл нәтижені сақтықпен бағалау қажеттігін атап өтті.
Күніне 6–8 стақан шай ішу керек пе?
Зерттеу нәтижесінде аптасына кемінде бір рет шай ішетіндердің арасында күніне шамамен 6–8 стақан шай тұтынатын адамдардың ауруға шалдығу қаупі төмен екені болжанды.
Алайда зерттеушілер бұл мөлшерді барлығына бірдей ұсынылатын күнделікті норма деп қабылдауға болмайтынын ескертті. Өйткені стақандардың көлемі бірдей емес, ал шай тұтыну мөлшері туралы деректер қатысушылардың өз мәліметтеріне сүйеніп жиналған.
Мамандар шайды ауыз бен тамақты күйдіретіндей ыстық күйінде ішпеуге, мүмкіндігінше қантсыз тұтынуға және күнделікті кофеин мөлшерін қадағалауға кеңес береді.
Сондай-ақ жүрек саулығын сақтау үшін темекі шекпеу, дене белсенділігін арттыру және дұрыс тамақтану маңызды екенін атап өтті.
