5 рет «Алтын доп» (Ballon d'Or) жүлдесін иеленген 41 жастағы португалиялық жұлдыз жуырда жұбайы Джорджина Родригеспен отбасын құрғаннан кейін “Vogue” журналына берген сұхбатында «Бұл бәлкім менің футболдағы мансабымның соңғы жылы болар, сондықтан артымда керемет мұра қалдырғым келеді», — деп мәлімдеді.
Болашағын толықтай жоспарлап қойғанын жеткізген Роналду отбасымен көбірек уақыт өткізуді асыға күтетінін айтты.
Футболдан кейін пайда болатын бос кеңістікті түрлі әуестіктермен толтыратынын білдірген тәжірибелі ойыншы саяхаттауды, өзі ұнататын падел ойнауды және 25 жылдық еңбек пен толассыз күрестен кейін қол жеткізген табыстарының қызығын көруді қалайтынын жеткізді.
1000 гол мақсаты
Осы жазда Португалия ұлттық құрамасымен өзінің алтыншы Әлем чемпионатында өнер көрсетіп, қарсылас қақпасын дәл көздеу арқылы рекорд жаңартқан Роналду осы уақытқа дейін клубтық және ұлттық құрама мансабында жалпы 976 голға жетті.
«Манчестер Юнайтед», «Реал Мадрид» және «Ювентус» сияқты алып клубтардың жейдесін киген футболшы мансабында 1000 гол межесін бағындыруды мақсат етеді.
Сауд Арабиясының «Әл-Наср» клубымен келісімшартының соңғы жылына аяқ басқан Роналдудың осы маусымдағы өнер көрсетуі оның тарихи мақсатына жете алу-алмауын айқындайтын болады.
