Иран Сыртқы істер министрі Аббас Аракчи Израиль премьер-министрі Беньямин Нетаньяхуды түрме жазасынан жалтару үшін АҚШ-ты Иранмен жаңа соғысқа итермелеп отыр деп айыптады.
Аббас Аракчи «X» әлеуметтік желісіндегі парақшасында Нетаньяхудың Иранға қарсы мәлімдемелеріне жауап берді.
«Нетаньяху бас бостандығынан айырылмау үшін Израиль мен АҚШ президенті үшін туындауы мүмкін салдарды ескермей, АҚШ-ты жаңа соғысқа итермелеп отыр», – деді Иран Сыртқы істер министрі.
Иранды біржола талқандауға бағытталған шабуылдардан кейін елдің бұрынғыдан да күшейе түскенін айтқан Аракчи: «Бағыңызды тағы бір мәрте сынағыңыз келе ме? Ендеше, байқап көріңіз. Бірақ сақ болыңыз, біздің де әлі аяқталмаған жұмыстарымыз бар», – деді.
«The Times of Israel» газетінің хабарлауынша, Израиль премьер-министрі Беньямин Нетаньяху 27 қазанда өтетін сайлаудың ел болашағы үшін маңызды екенін екенін айтып, жариялаған қауіпсіздік доктринасында Ирандағы билікті құлату мәселесіне тоқталған.
Нетаньяху Ирандағы экономикалық жағдайдың күн сайын нашарлауы халықтың наразылығын күшейтіп, жаңа шерулерге ұласуы мүмкін екенін алға тартқан.
«Біздің жоспарымыз – Ирандағы билікті құлатуға бағытталған жан-жақты әрі батыл жоспар. Мен барлық қауіпсіздік құрылымына осы бағытта тапсырма бердім», – деген болатын Нетаньяху.
