Түркі Мемлекеттері Ұйымына (ТМҰ) мүше және бақылаушы елдер арасында білім беру саласындағы ынтымақтастықты нығайту мақсатында «ТМҰ Білім беру ақпараттық желісі» құрылады. Бұл шешім 8 маусымда Түркістанда өткен ТМҰ-ның Білім министрлерінің 9-шы отырысында Түркия Республикасының Ұлттық білім беру министрі Юсуф Текиннің қатысуымен қабылданды.
Түркияның ұсынысымен жүзеге асырылатын бұл желі мүше және бақылаушы мемлекеттердің білім беру жүйелеріне қатысты мәліметтерді ортақ әдіснамамен жинақтауды, талдауды және салыстыруды қамтамасыз етеді. Осы орайда Ұлттық білім беру министрлігі жанынан сарапшылардан тұратын жұмыс тобы құрылды. Алдағы кезеңде басқа ел өкілдерінің де қатысуымен ортақ жұмыс механизмі қалыптастырылады.
Желінің негізгі мақсаттарының қатарында білім беру саласында ақпарат пен тәжірибе алмасуды арттыру, ортақ саясатты дамыту процестерін қолдау және елдер арасында өзара үйренуді нығайту бар. Алғашқы кезеңде ортақ мәліметтер инфрақұрылымы құрылады, кейіннен тақырыптық есептер, саяси талдаулар мен салыстырмалы зерттеулер дайындалады.
Бұл жүйе халықаралық мысалдардағы бәсекелестікке негізделген тәсілдерден өзгеше түрде ынтымақтастық, бірлесіп үйрену және институционалдық даму түсінігін негізге алады. Осылайша түркі әлеміне тән білім беру тәжірибелері мен озық үлгілерді арттыру, білім беру саясатын айғақты мәліметтермен негіздеу көзделіп отыр.
Желіні стратегиялық түрде мүше және бақылаушы мемлекеттер тең дәрежеде өкілдік ететін Білім беру кеңесі басқарады. Ал техникалық және әкімшілік үйлестіру Түркияда құрылуы жоспарланған Үйлестіру орталығы тарапынан қамтамасыз етіледі. Орталық мәліметтерді басқару, талдау, есеп беру және елдер арасындағы үйлестіру міндеттерін өз мойнына алады.
Мәліметтер қауіпсіздігі басты басымдық болатын бұл желіде тек елдер бөлісуді мақұлдаған ақпараттар ғана пайдаланылады және барлық процесс халықаралық ақпараттық қауіпсіздік стандарттарына сай жүргізіледі.
Дайындалатын білім беру есептері мен зерттеулері мүше және бақылаушы елдердің ресми тілдерінде жарияланады. Түркі әлемінде өндірілген білім мен тәжірибенің халықаралық деңгейде танымалдылығын арттыру мақсатында негізгі басылымдарды ағылшын тілінде де жарыққа шығару жоспарлануда. Ұзақ мерзімді перспективада бұл желі түркі әлемінде ортақ білім беру стандарттарын дамытуға және ТМҰ-ның білім беру саласындағы халықаралық беделін нығайтуға үлес қосады деп көзделуде.
