Украина президенті Владимир Зеленский АҚШ президенті Дональд Трамп энергетикалық нысандарға шабуылдарды тоқтату туралы келісімді жариялағаннан кейін көп ұзамай Ресейдің Харьков қаласындағы электр станциясына соққы жасағанын мәлімдеді.
Дүйсенбі күні Варшава қауіпсіздік форумында сөз сөйлеген Зеленский Украинаның бұл ұсынысты қолдайтынын, бірақ Ресейдің оны қабылдағанын растайтын ешқандай дәлел жоқ екенін жеткізді.
«Энергетикалық нысандарға шабуылдарды тоқтату жөніндегі бұл келісім нәтижелі болып, соғысты аяқтау жолындағы маңызды қадамға айналуы мүмкін», – деді Зеленский. Ол сондай-ақ Киевтің Вашингтон мен Мәскеу арасындағы келіссөздердің егжей-тегжейлі мәліметтерін күтіп отырғанын айтты.
Жексенбі күні Трамп Ресей мен Украинаның энергетикалық инфрақұрылымға жасалатын шабуылдарды дереу тоқтатуға келіскенін мәлімдеген болатын. Алайда ол келісімнің егжей-тегжейін ашып айтпады.
Дүйсенбі күні Кремль қандай да бір келісімге қол жеткізілгені туралы ақпаратты растаған жоқ.
Кремльдің баспасөз хатшысы Дмитрий Песков тараптар арасындағы байланыстар жалғасып жатқанын және Мәскеудің алдағы уақытта өзгерістер туралы хабарлайтынын мәлімдеді.
Ал Зеленский: «Егер Ресей де осы келісімді орындауға дайын болса, біз энергетикалық нысандарға шабуылдарды тоқтату жөніндегі келісімді сақтауға дайынбыз», – деді.
Украина президенті Ресей шабуылдарын жалғастырған жағдайда Киевтің қарымта шабуыл жасайтынын ескертті.
«Егер Ресей біздің мұнай өңдеу зауыттары мен мұнай экспортына қатысты нысандарға ұзақ қашықтықтан соққы жасауды тоқтатқанымызды қаласа, онда өзі де біздің энергетикалық жүйеміз бен аса маңызды инфрақұрылымымызға шабуыл жасауды тоқтатып, бейбіт тұрғындарға шабуылды тоқтатуы тиіс», – деді ол.
Сонымен қатар Зеленский Мәскеудің ұсынылған келісімді қабылдауы үшін Вашингтонды Ресейге қысым жасауға шақырды.
«Бізге Ресейге қатысты АҚШ-тың нақты қысымы қажет. Санкцияларды жеңілдету немесе қандай да бір жеңілдіктер жасау емес, нақты қысым керек. Сонда ғана АҚШ президентінің кеше айтқан бастамасын яғни энергетикалық нысандарға шабуылдарды тоқтату туралы келісімді жүзеге асыра аламыз», – деді Зеленский.
