Украина президенті Владимир Зеленский Ресей Федерациясына қарасты Башқұртстан Республикасының астанасы Уфадағы мұнай өңдеу зауытына қайта соққы жасалғанын хабарлады.
Владимир Зеленский әлеуметтік желідегі мәлімдемесінде Ресейдегі бірқатар нысанға шабуыл жасалғанын айтты.
Зеленский Уфадағы мұнай өңдеу зауытына қайта соққы берілгенін айтып, бұл нысанның майдан шебінен шамамен 1300 шақырым қашықта орналасқанын мәлімдеді.
Ол сондай-ақ Украинадан шамамен 600 шақырым жерде орналасқан Ресейдің Пенза облысындағы зымыран бөлшектері өндірілетін кәсіпорынның да нысанаға алынғанын жеткізді.
Ресейдің бейбітшілікке келуі керек екенін атап өткен Зеленский: «Ресей бұл соғысты тоқтатуы тиіс», – деді.
Зеленский Ресейдегі нысандарға жасалған шабуылдарға қатысты бейнежазба жариялады.
Украина күштері бұған дейін де Уфадағы мұнай өңдеу зауытына шабуыл жасаған еді.
Ал Украина Әуе күштері қолбасшылығының жазбаша мәлімдемесіне сәйкес, Ресей күштері кеше түнде Украинаға 2 зымыран және 153 дронмен шабуыл жасаған.
Мәлімдемеде Украина әуе күштерінің 1 зымыран мен 130 дронды залалсыздандырғаны айтылды.
Украина Мемлекеттік төтенше жағдайлар қызметінің әлеуметтік желідегі мәлімдемесінде Ресейдің шабуылдары салдарынан Днепропетровск облысында бір адам қаза тауып, үш адам жараланғаны хабарланды.
