Украина Президенті Владимир Зеленский Ресеймен жалғасып жатқан соғыс кезінде сайлау өткізу туралы үндеулерді қабылдамай, сенбі күні қазіргі жағдайда дауыс беру аса қауіпті болатынын мәлімдеді.
«Мұндай соғыс жағдайында сайлау өткізу — өз алдына үлкен тәуекел. Қазір сайлау ел үшін Украинаны екіге бөлетін цунамиге айналар еді», - деді ол.
Украинада әскери жағдайға байланысты сайлау өткізу тоқтатылған. 2022 жылдан бері Ресейге қарсы соғысып келе жатқан елде бұл шара әлі де кең қолдауға ие.
Зеленский бұл мәлімдемені сенбі күні журналистерге арналған брифингте жасады. Бұл бірқатар саяси дағдарыстан кейін бірнеше айдан бері өткізілген алғашқы баспасөз мәслихаты болды.
Бұрынғы министр сайлау өткізуге шақырды
Бұл мәселе бұрынғы Қорғаныс министрі Михайло Федоровтың осы аптада сайлауды қалай өткізуге болатыны жөнінде шешім табуға шақыруынан кейін қызу талқылана бастады. Алайда Федоров нақты іс-қимыл жоспарын ұсынған жоқ.
Сарапшылар сайлау өткізудің алдында бірқатар кедергі бар екенін атап өтті. Олардың қатарында әскери қызметшілердің, миллиондаған украиналық босқынның және Ресей басып алған аумақтардағы тұрғындардың қалай дауыс беретіні, сондай-ақ Ресей тарапынан таралуы мүмкін жалған ақпарат қаупі бар.
Киев халықаралық әлеуметтану институтының сауалнамасына сәйкес, украиналықтардың небәрі 15 пайызы соғыс қимылдары аяқталмай тұрып сайлау өткізу керек деп санайды.
Зеленский алауыздық қаупі туралы ескертті
Сайлау төңірегіндегі пікірталас Украина мен Ресей бір-біріне күн сайын зымырандармен және ұшқышсыз ұшу аппараттарымен соққы жасап жатқан кезеңде өршіп отыр.
Зеленский қоғам мен армияның бірлігін сақтау қажеттігін атап өтіп, алауыздық тереңдей түссе, «қауіпті оқиғалардың» болуы мүмкін екенін екенін ескертті.
«Мұндай қауіптің бар екенін мойындауымыз керек. Жағдай сол бағытқа, яғни қауіпті оқиғаларға қарай өрбуі мүмкін», - деді Зеленский.
