Барак Нетаньяхудың Түркиямен қарым-қатынастағы шиеленісті «әдейі» ушықтыруын «ақылға қонымсыз әрекет» деп бағалады.
Ол сәрсенбі күні «X» әлеуметтік желісіндегі жазбасында: «Қай себептің басым екенін айту қиын. Алайда сайлау қарсаңында қоғамдағы алаңдаушылықты күшейтетін қауіпсіздік мәселелерінің әдейі алға шығарылуынан саяси мүдде анық байқалады», — деді.
Түркияның «Иран да, Асад кезіндегі Сирия да емес» екенін айтқан Барак Анкарамен арадағы мәселелерді шешуге болатынын атап өтті.
«Түркиямен арадағы кез келген стратегиялық мәселені АҚШ-пен үйлестірілген жабық келіссөздер арқылы ұзақ мерзімде реттеуге, шиеленісті бәсеңдетуге немесе шешімін кейінге қалдыруға болады. Нетаньяху шектен шықты», — деп жазды ол.
Барактың айтуынша, соғыс мақсаттарының орындалмауы және алдағы саяси жеңіліс қаупі Нетаньяхуды Израильдің қауіпсіздігінен гөрі өз билігін сақтап қалуға басымдық беруге итермелеп отыр. Ол мұны құмар ойыншының әрекетіне теңеді.
«Оның ойланбай жасаған әрекеттері санаулы одақтастарымыз бен достарымызды қатты алаңдатып отыр», — деді Барак.
Ол сондай-ақ Нетаньяху келтірген дипломатиялық залалды қалпына келтіруге ұзақ уақыт қажет болатынын айтып, соңында кері нәтиже беруі ықтимал мұндай қадамдарды жалғастырудың еш қисыны жоқ екенін айтты.
«Арандатушы әрі қауіпті»
Израиль оппозициясының жетекшісі Яир Голан Израильдің Сирияға жасаған соңғы шабуылын «арандатушылық сипаттағы қауіпті қадам» деп атап, оның ел мен одақтастарының, әсіресе АҚШ-тың арасындағы алшақтықты одан әрі тереңдеткенін айтты.
Израиль демократтары партиясының жетекшісі Голанның айтуынша, бұл шабуыл Израиль мен Түркия арасындағы қақтығыс қаупін одан әрі күшейткен.
Ол «X» әлеуметтік желісіндегі жазбасында: «Әскери күш тағы да саяси мүдделер үшін пайдаланылып отыр, ал оның қауіпсіздік саласындағы зардабын тағы да Израиль тартып жатыр», — деді.
Голан Нетаньяхуды аймақта тұрақтылық орнатуға қабілетсіз, шектен шыққан әрі сенімсіз саясаткер деп айыптады.
