Қазақстан мен Татарстанның елордалары арасында жаңа әуе рейстері жұмыс істей бастады. Іске қосылған «Қазан-Астана-Қазан» бағытының ашылу салтанаты Астана халықаралық әуежайында өтті.
Қазақстанның Қазандағы Бас консулы Ерлан Ысқақов салтанатты шарада сөйлеген сөзінде жаңа рейстердің туризм, бизнес, мәдениет және спорт салаларындағы ынтымақтастықты дамытуға үлес қосатынын атап өтті.
Жиында жаңа бағыттың арқасында жолаушылардың Татарстанның астанасы Қазан арқылы Ресейдің басқа да өңірлеріне қиындықсыз жете алатыны айтылды.
Рейстерді жүзеге асыратын Ресей әуе компаниясының өкілі Александра Галикбарова: «Қазан қаласы Астанадан Ресейдің әртүрлі аймақтарына сапар шеккісі келетін жолаушылар үшін транзиттік хаб ретінде де қолданыла алады», – деді.
«Қазан-Астана» рейстері “Boeing 737” типті ұшақтарымен аптасына екі рет – сейсенбі және жұма күндері орындалады.
(Ұшақтардың Астанаға жергілікті уақытпен сағат 05:15-те қонуы, ал Қазанға кері қайтуы 06:30-да жүзеге асырылуы жоспарланған.)
Елордалар арасындағы барып-қайту билеттерінің болжамды бағасы 244 доллар (110 мың теңге) деп жарияланды.
Жолға қойылған жаңа рейстер арқылы екі ел арасындағы қатынасты жеңілдету, туристік және сауда-эконмикалық байланыстарды дамыту көзделіп отыр.
