Президент Режеп Тайып Ердоған Косовоның жаңа президенті Юстина Широка Пуланы қызметке кірісуіне байланысты құттықтап, оған сәттілік тіледі.
Косово Президенттігінен жасалған жазбаша мәлімдемеге қарағанда, Широка Пула қызметіне кірісуіне орай президент Режеп Тайып Ердоғаннан құттықтау хатын алды.
Президент Ердоған хатында түрік халқының және өз атынан Широка Пулаға ыстық ықыласты құттықтауын жеткізіп, екі ел арасындағы көпқырлы ынтымақтастықтың алдағы кезеңде де дами беретініне сенім білдірді.
Ердоған Пуланың қызмет мерзімі барысында екі ел арасындағы ынтымақтастықтың аймақтық тұрақтылық пен бейбітшілікке қосқан үлесінің арта түсетінін баса айтты.
Хаттың соңында Широка Пулаға денсаулық пен бақыт тілеген президент Ердоған дос әрі бауырлас деп атаған Косово халқына да амандық тіледі.
Косовоның 3-ші әйел президенті
Широка Пула 2008 жылы Сербиядан біржақты тәуелсіздігін жариялаған Косовоның 3-ші әйел президенті болды.
120 орындық Косово Парламентінде 6 қазанда өткен дауыс беруде Косово Ғылым және өнер академиясының (ASHAK) төрайымы, 73 жастағы Юстина Широка Пула 81 депутаттың қолдауына ие болып, елдің жаңа президенті болып сайланды.
Косовоның бұрынғы президенті Вйоса Османидің 5 жылдық қызмет мерзімі 4 сәуірде аяқталған болатын.
Экономика саласында ұзақ жылдар бойы ғалым болып жұмыс істеген Широка Пула 2008–2011 жылдар аралығында Косово Энергетика және тау-кен өнеркәсібі министрі, 2011–2014 жылдар аралығында депутат қызметін атқарды.
Широка Пула 2025 жылдың желтоқсанында ASHAK төрайымы болып сайланған еді.
