Украина президенті Владимир Зеленский Ресей аумағында 8 мыңнан астам Солтүстік Корея әскери қызметкері орналасқанын айтып, тағы 10 мың сарбазды жіберуге дайындық белсенді түрде жүріп жатқанын мәлімдеді.
Пхеньян мен Мәскеу арасындағы әскери ықпалдастыққа қатысты «жаңа деректерге» сілтеме жасаған Зеленский Солтүстік Кореяның қосымша әскери бөлімдері «дайындықтан өтіп, кейін Ресейге жіберу үшін іріктелгенін» айтты.
Бұл мәлімдеме Украина басшысының тамыз айында жасаған ескертуінен кейін айтылды. Ол сол кезде Солтүстік Кореяның 50 мыңға жуық әскери қызметкері Ресей армиясы жағында соғысу үшін жіберілуі мүмкін екенін мәлімдеген еді. Осыдан кейін Киев Оңтүстік Кореяны әуе қорғанысы саласында қолдау көрсетуге шақырған болатын.
Сеул шілде айында Украинаға құны 100 миллион доллар болатын, қару-жараққа жатпайтын материалдардан тұратын көмек пакетін беруге уәде еткен еді.
Пхеньянның қару-жарақ қоры
Зеленскийдің бұл мәлімдемесі Украина күштері тұтқынға алған екі Солтүстік Корея сарбазының Оңтүстік Кореяға жеткізілгенін өткен аптада жариялағаннан кейін Сеул мен Киев арасында туындаған дипломатиялық шиеленістен соң айтылды.
Оңтүстік Корея үкіметі екі елдің де сарбаздарды жеткізу ісін құпия ұстауға өзара келіскенін мәлімдеп, бұл ақпараттың көпшілікке жария етілгеніне өкініш білдірді.
Украина мен Оңтүстік Корея барлау қызметтерінің мәліметінше, Солтүстік Корея 2024 жылдан бері Ресейдің Украинадағы әскери іс-қимылдарын қолдау мақсатында шамамен 14 мыңнан 15 мыңға дейін әскери қызметкер жіберген.
