Ресейдің Пермь өлкесінің губернаторы Дмитрий Махонин әуе қорғанысы жүйелері 39 дронды атып түсіргенін, ал өнеркәсіптік нысанға жасалған шабуыл салдарынан бір адамның қаза тапқанын мәлімдеді.
Ульяновск облысының губернаторы Алексей Русских сегіз адамның жараланғанын хабарлады. Ал Воронеж облысының губернаторы Александр Гусев төрт адамның жараланғанын және аймақта 88 дронның атып түсірілгенін мәлімдеді.
Ростов облысының губернаторы Новошахтинск мұнай өңдеу зауытына зақым келіп, жұмысы тоқтатылғанын, алайда адам шығыны болмағанын айтты.
Ресей Қорғаныс министрлігі түн ішінде 18 аймақта, Қаратеңіз үстінде және Ресей басып алған Қырымда Украинаның 592 дроны атып түсірілгенін мәлімдеді.
Украинадағы шабуылдар
Ресей түнгі шабуылдар кезінде Киев маңындағы украиналық “Fire Point” компаниясына тиесілі дрон өндіріс нысанына, сондай-ақ Одессадағы Украина армиясына қолдау көрсетеді делінген логистикалық орталықтар мен порт инфрақұрылымына соққы жасалғанын мәлімдеді.
Украина Әуе күштері түнде ұшырылған Ресейдің 295 дронының 267-сі атып түсірілгенін хабарлады.
Соңғы айларда екі тарап та логистикалық нысандарға, порттар мен энергетикалық инфрақұрылымға шабуылдарын күшейтті. Алайда екі тарап та бейбіт тұрғындарды әдейі нысанаға алды деген айыптауларды жоққа шығарып отыр.
