Түркия Ирактың Керкүк қаласына түрікмен губернатордың тағайындалуын құптап, мұны инклюзивтілік пен өкілдіктегі әділеттілік тұрғысынан тарихи қадам ретінде бағалады.
Сыртқы істер министрлігі мәлімдемесінде Ирак Түрікмен майданының төрағасы Мехмет Семан Агаоглу дүйсенбі күні Ирак президентінен мандатын алып, ресми түрде Керкүк губернаторы қызметіне кіріскенін хабарлады.
Агаоглу 16 сәуірде Керкүк облыстық кеңесі тарапынан губернатор болып сайланған еді.
Министрлік мәлімдемесінде «Мәдени әртүрлілікке және көпқұрамды құрылымға ие Керкүкке түрікмен губернатордың сайлануы инклюзивтілік, өкілдіктегі әділеттілік және қоғамдық тұрақтылықты нығайту тұрғысынан аса маңызды әрі тарихи оқиға», – делінген.
Министрлік бұл тағайындауды «Ирак пен Керкүктің негізгі құрамдас бөлігі түрікмен бауырларымыз үшін заңды құқықтың кешігіп болса да берілуі» деп бағалады.
Мәлімдемеде сондай-ақ Керкүкте жоғары деңгейдегі әкімшілік қызметтердің құрамдас топтар арасында келісім негізінде кезектесіп бөлінуі тек түрікмендер үшін ғана емес, қаладағы барлық топтар үшін әділ әрі теңгерімді жетістік екені айтылды.
Анкара бұл қадам Ирак пен Керкүк халқының тыныштығы, қауіпсіздігі және әл-ауқатына үлес қосады деп үміттенетінін, сондай-ақ елдегі жалпы тұрақтылықты нығайтуға ықпал етуі мүмкін екенін білдірді.
