Германия канцлері Фридрих Мерц Германияның астанасы Берлинде Еуропалық Одақ (ЕО) Кеңесінің Төрағасы Антониу Коштамен кездесуінен кейін өткізілген бірлескен баспасөз конференциясында баяндама жасады.
АҚШ делегациясының Украинада келіссөз жүргізіп жатқанына назар аударған Мерц: «Қазіргі уақытта Ресей үкіметі мен Ресей президентінің соғысты аяқтау үшін маңызды келіссөзге дайын екендігіне қатысты белгілерді көріп тұрған жоқпыз», — деді.
Қолда бар мүмкіндіктермен бұл мәселені дипломатиялық жолмен шешу үшін күш салып жатқандарын білдірген Мерц: «Дегенмен Ресей үкіметі диалогқа, келіссөздерге және дипломатиялық шешімге қатысты барлық ұсыныстарға өз есігін жауып отырғанда, бұл процестің жүзеге асу мүмкіндігін салыстырмалы түрде аз деп санаймын», — деп қосты.
Дипломатиялық шешім табуға бағытталған әрекеттерді жалғастыратындарын атап өткен Мерц Украинаға көрсетіліп жатқан барлық қолдау соғыстың созылуына емес, керісінше оның аяқталуына қызмет ететінін жеткізді.
Журналист сұрағына жауап бере отырып, Германияның Саксония-Анхальт жеріндегі парламент сайлауында жеңіске жеткен AfD («Германия үшін балама») партиясын жабу мүмкіндігін қарастыру төңірегіндегі пікірталастарға баға берген Мерц бұндай тыйым салу процесінің сәтті аяқталатынына күмәнмен қарайтынын білдірді.
«Бұл партияға тыйым салу арқылы мәселе шешіледі деп ойламаймын», — деген Мерц бұл жерде AfD-мен саяси тұрғыда күрес жүргізу бірінші орында болуы керектігін атап өтті.
«Кімде-кім Германияның ЕО-ға мүшелігіне күмән келтірсе, ЕО-дан, евроаймақтан және Шенген аймағынан шыққысы келсе, ол еліміздің әл-ауқатының елеулі бөлігіне қауіп төндіреді», — деген Мерц бұл себепті ЕО-ның дамуы үшін қолдан келгеннің бәрін жасайтынын хабарлады.
«Соғыстың аяқталмауының жалғыз себебі — Ресейдің бұған дайын болмауы»
ЕО Кеңесінің Төрағасы Кошта да Украина соғысы басталғаннан бері әділ әрі тұрақты бейбітшілік үшін күресіп жатқандарын тілге тиек етіпғ «Соғыстың аяқталмауының жалғыз себебі — Ресейдің бұған дайын болмауы», — деді.
Ресейді соғысты аяқтауға, атысты тоқтатуға дайын екенін мәлімдеуге және келіссөз үстеліне отыруға көндіру мақсатында жасалған барлық бастамаларды қолдайтындарын баса айтқан Кошта: «Бейбітшілік орнататын уақыт келді және Ресей соғысты тоқтатуы тиіс», — деді.
Кошта бұл бейбітшіліктің әділ әрі тұрақты болуы керектігін де сөзіне қосты.
