Украина президенті Владимир Зеленский Ресейдегі Новороссийск әскери-теңіз базасына шабуыл жасалғанын мәлімдеді.

Зеленский әлеуметтік желідегі парақшасында Украина күштерінің Ресей аумағындағы нысандарға бағытталған шабуылдары туралы ақпарат берді.

Оның айтуынша, майдан шебінен 300 шақырымнан астам қашықтықта орналасқан Новороссийск әскери-теңіз базасына жасалған шабуылда «Нептун» зымырандары, «Паляниця» үлгісіндегі қарулы дрон және теңіз дрондары қолданылған.

Зеленский: «Әуе қорғанысы бекеттеріне, айлақтар мен порт инфрақұрылымына соққы тигені расталды», – деді.

Ресей аумағындағы нысандарға шабуылдардың жалғасып жатқанын атап өткен Зеленский: «Ресейдің басқыншылығы жалғасқан жағдайда оның әскери флоты мен оған қызмет ететін инфрақұрылым қауіпсіз бола алмайды. Соғысты тоқтату қажет. Дипломатиялық шешімге бағытталған тиімді ұсыныстар дайын», – деді.

Сондай-ақ Зеленский осы шабуылға қатысты бейнежазба жариялады.