Президент Трамп екіжақты келісім жасалған жағдайда Иранның жаңа Діни жетекшісі Моджтаба Хаменеимен кездесуді өзі үшін «үлкен мәртебе» деп санайтынын айтты.
Моджтаба Хаменеи АҚШ пен Израильдің Иранға қарсы 28 ақпанда бастаған әскери операциясы кезінде қаза тапқан әкесі Әли Хаменеидің орнына келген болатын.
Трамп Иран үкіметінің әрекеті салдарынан америкалық әскери қызметкерлер қаза тапқан жағдайда АҚШ-тың жедел әскери жауап қайтаратынын ескертті.
Сондай-ақ ол АҚШ-қа Иранның байытылған уранын бақылауға алу үшін арнайы келісім қажет емес екенін, қажет болған жағдайда оған қол жеткізе алатынын мәлімдеді.
Ақпанда басталып, 40 күнге созылған қақтығыстардан кейін Пәкістанның арағайындығымен қол жеткізілген атысты тоқтату келісімі 8 сәуірде күшіне енді. Алайда Ормуз бұғазы, Кувейт және Бахрейн маңында ара-тұра болатын қақтығыс салдарынан өңірдегі шиеленіс әлі де сақталып отыр.
АҚШ пен Израиль ұзақ уақыттан бері Иранды ядролық қару жасауға ұмтылып отыр деп айыптап келеді. Тегеран бұл айыптауларды жоққа шығарып, өзінің ядролық бағдарламасы тек бейбіт мақсаттарға арналғанын мәлімдейді.
Трамп тұрақты бейбіт келісім Иранның ядролық қаруға ие болмайтынына кепілдік беруі тиіс деген ұстанымын қайталады.
