Түркия Сыртқы істер министрі Хакан Фидан Ресей мен Украина арасындағы соғыстың Қаратеңізге ұласуын қаламайтындарын білдіріп, «Қаратеңіздегі порттардың, танкерлер мен балықшы қайықтарының нысанаға алынуы және бейбіт тұрғындардың өміріне қауіп төндірілуі ақтауға келмейді», – деді.
Фидан бұл туралы Украина астанасы Киевте Украина Сыртқы істер министрі Андрей Сибигамен бірлескен баспасөз мәслихатында айтты.
Ол шиеленістің түрлі жолдармен күшейіп келе жатқанын жеткізді.
Фидан Қаратеңізге қауіп төндіретін оқиғалар алаңдаушылықты одан әрі арттырғанын айтып, «Ресей мен Украина арасындағы соғыстың Қаратеңізге ұласуын қаламаймыз», – деді.
«Түркия теңіз күштеріне басшылық етуді қабылдады»
Фидан Ресей мен Украина арасында жасалуы ықтимал бейбіт келісімнің ең маңызды тармақтарының бірі Украинаға берілетін қауіпсіздік кепілдіктері екенін атап өтті. Оның айтуынша, бұл кепілдіктер құрлықтағы, теңіздегі және әуедегі қауіпсіздік шараларын қамтиды.
Осы тұрғыда Түркияның үлесіне тоқталған Фидан: «Түркия теңіз күштеріне жетекшілік етуді өз мойнына алуға келісті. Бұл мәселе бойынша одақтастарымызбен ортақ келісімге келдік. Қазіргі таңда одақтас елдердің әскери-теңіз күштері де жоспарлау жұмыстарын жүргізіп жатыр», – деді.
Сибига: «Ресеймен атысты тоқтатуға дайынбыз»
Украина Сыртқы істер министрі Андрей Сибига елінің Ресеймен атысты тоқтатуға дайын екенін мәлімдеп, бейбітшілік үдерісіне жаңа серпін беретін келесі қадам көшбасшылар саммиті болатынын айтты.
Сибига Украина президенті Владимир Зеленский мен Ресей президенті Владимир Путин арасында өтуі ықтимал кездесудің Түркияда өтуі мүмкін екенін айтты.
