Ұлттық ассамблея төрағасы Хорхе Родригес жексенбі күні жасаған мәлімдемесінде өткен айда Венесуэлада болған екі ірі жер сілкінісінен қаза тапқандар саны 5 208 адамға жеткенін хабарлады.
Родригес “X” әлеуметтік желісіндегі парақшасында жер сілкіністері салдарынан 16 740 адамның жараланғанын мәлімдеді. Сонымен қатар 128 324 отбасыға көмек көрсетілгенін, 107 уақытша баспана ашылғанын және онда 23 820 адамның орналастырылғанын айтты.
Қоршаған ортаны қалпына келтіру жұмыстары жалғасуда
Венесуэланың Қоршаған орта министрлігі табиғи апаттан ең көп зардап шеккен өңірлердің бірі – Ла-Гуайра жағалау аймағын қалпына келтіруге бағытталған жұмыстардың жалғасып жатқанын хабарлады.
Министрлік “Instagram” желісінде жариялаған мәлімдемесінде жағалау белдеуінің экологиялық тепе-теңдігін қалпына келтіру және жергілікті экожүйені жақсарту мақсатында бұл аумақтарға жергілікті өсімдік түрлері отырғызылатынын білдірді.
Қоршаған орта министрі Нельсон Родригестің айтуынша, қос жер сілкінісі зардап шеккен өңірде шамамен 2,106 миллион тонна үйінді қалдығы пайда болған.
Оның айтуынша, бұл есеп Венесуэла үкіметі мен Біріккен Ұлттар Ұйымының Даму бағдарламасы бірлесіп жүргізген зерттеу нәтижесіне негізделген.
24 маусым күні Венесуэлада магнитудасы 7,2 және 7,5 болатын екі қуатты жер сілкінісі болған еді.
