АҚШ Мемлекеттік хатшысы Марко Рубио Иранмен келіссөздердегі ілгерілеудің «айтарлықтай нәтижелі болмағанын» атап өтіп, Тегеранмен дипломатиялық келісімге келу “екіталай”екенін айтты.

Марко Рубио G7 елдерінің сыртқы істер министрлерінің кездесуіне қатысу үшін Франция астанасы Парижге аттанар алдында журналистердің сұрақтарына жауап берді.

Рубио: «Президент (АҚШ президенті Дональд Трамп) бұл мәселені және кез келген басқа мәселені әрдайым дипломатиялық жолмен шешуді жөн көреді. Алайда, өкінішке қарай кейде бұл мүмкін болмай қалады», – деді.

Вашингтонның дипломатиялық бастамаларға ашық екенін атап өткен Рубио Иранның талаптарын «ақылға қонымсыз» деп сипаттады.

АҚШ-тың жаңа әскери шабуылдар жасау ықтималдығына қатысты Рубио Вашингтонның әрекеттері «қорғаныс мақсатында» жүзеге асырылатынын және «АҚШ күштері мен теңіз қатынасына төнетін қауіпке байланысты айқындалатынын» айтты.

Рубио аймақтағы АҚШ күштеріне немесе теңіз тасымалына тікелей әрі жақын арада төнуі мүмкін қауіп анықталған жағдайда Вашингтонның өзін-өзі қорғауға құқығы бар екенін жеткізді.

Марко Рубио Трамптың Иранмен жалғасып жатқан соғысқа қатысты ұстанымын қорғап, АҚШ президентінің Иранның ядролық қаруға қол жеткізу әрекеттерін тоқтату үшін «нақты қауіп-қатерді көргенін» және «қоғам арасында қолдау таппайтын шара болса да», осы бағытта әрекет еткенін айтты.

Рубио ел қауіпсіздігіне қатысты күрделі мәселелерді шешу әрдайым қоғамның қолдауына ие бола бермейтінін, алайда мұндай әрекеттің қажет екенін атап өтті.