Иранның рухани көсемі Моджтаба Хаменеи Парсы шығанағының болашағы АҚШ-сыз қалыптасатынын атап өтіп, Ормуз бұғазына қатысты жаңа құқықтық және әкімшілік тетіктер тұрақтылық пен экономикалық мүмкіндіктерді арттыратынын айтты.
Хаменеи бейсенбі күні жариялаған жазбаша мәлімдемесінде, ең алдымен АҚШ бастаған шетелдік күштердің аймақтағы операциясы тұрақсыздықтың көзі екенін айтып, жаңа кезеңнің басталғанын жеткізді.
Парсы шығанағын өңірлік болмыс пен жаһандық сауда тұрғысынан маңызды орталық ретінде сипаттаған Хаменеи Ормуз бұғазы мен Оман теңізінің стратегиялық маңызын атап өтті.
Хаменеи Иранның Ормуз бұғазына қатысты жаңартылған құқықтық негіздерді қамтитын жаңа басқару тәсілі арқылы Парсы шығанағында қауіпсіздікті қамтамасыз ететінін мәлімдеді. «Бұл тетіктер аймақтағы барлық мемлекет үшін тұрақтылық, даму және экономикалық пайда әкеледі», – деді ол.
Иранның рухани көсемі Парсы шығанағындағы елдердің тағдыры ортақ екенін айтып, мыңдаған шақырым қашықтан келетін сыртқы актерлерге бұл жерде орын жоқ екенін жеткізді.
Сондай-ақ мәлімдемеде соңғы жағдайлар аясында қалыптасып жатқан жаңа өңірлік тәртіпке де сілтеме жасалды.
Моджтаба Хаменеи әкесі Әли Хаменеи 28 ақпанда АҚШ пен Израильдің шабуылдары салдарынан қаза тапқаннан кейін, 9 наурызда рухани көсем болып сайланды. Қызметке кіріскеннен бері ол тек қана жазбаша мәлімдемелер жасап келеді.
