Жергілікті дереккөздердің «Анадолы» агенттігіне берген мәліметіне қарағанда, Израиль армиясы дүйсенбі күні кешке басып алынған Батыс Шерияның оңтүстігіндегі Хеврон қаласында бір баланы ұстап, тағы біреуіне оқ жаудырған.
Оқиға Хевронның солтүстігіндегі Әл-Арруб босқындар лагерінде болды, дереккөздер Израиль күштерінің тұрғындарға нағыз оқпен атқанын және соның салдарынан бір баланың жараланғанын хабарлады. Жараланған бала ауруханаға жеткізілді. Палестинаның «Wafa» ақпарат агенттігінің хабарлауынша, жеке басы әлі анықталмаған тағы бір бала тұтқындалды.
Сонымен қатар Израиль күштері Хевронның батысындағы Идхна кентіне жасаған рейд кезінде көз жасаурататын газ қолданған. Салдарынан көптеген палестиналық зардап шегіп, оларға оқиға орнында медициналық көмек көрсетілген. Рейд барысында Израиль сарбаздары кенттегі Әбу Жайша отбасылық залына басып кіріп, бірнеше жасты ұстап әкеткені хабарланды.
Қазіргі уақытта басып алынған Батыс Шериядағы 141 елді мекен мен 224 бекетте шамамен 750 000 заңсыз израильдік қоныстанушы тұрады. Оның ішінде 250 000-ға жуығы басып алынған Шығыс Иерусалимдегі 15 елді мекенде қоныстанған.
Палестина деректері бойынша, Израильдің 2023 жылдың қазан айында Газада бастаған геноцидтік соғысымен қатар басып алынған Батыс Шерияда Израиль армиясы мен заңсыз қоныстанушылардың шабуылдарынан кем дегенде 1 154 палестиналық қаза тапты. Сондай-ақ шамамен 11 750 адам жараланып, 22 000-ға жуық адам тұтқындалды.
Бұл шабуылдарға вандализм, үйлер мен нысандарды қирату, палестиналықтарды жер аудару және БҰҰ басып алынған Палестина территориясы деп танитын Батыс Шерия мен Шығыс Иерусалимдегі елді мекендерді үздіксіз кеңейту әрекеттері жатады. Палестиналықтар мұндай іс-әрекеттер Израильдің Батыс Шерияны ресми түрде аннексиялауына жол ашатынын және бұл БҰҰ шешімдерінде қарастырылған Палестина мемлекетін құру мүмкіндігін іс жүзінде жоятынын ескертеді.
